Minister Geoffrey Wever recien a duna un prome presentacion na Universidad di Aruba relaciona cu un investigacion riba e servicio di AirBnb na Aruba. E no tabata un presentacion facil. E mandatario mes no a spera e reaccion asina grandi den e presentacion duna. E tabata un encuentro basta cayente finalmente.
Hopi hende cu ta atende cu negoshi di AirBnb na Aruba a bay e presentacion. Durante entrevista cu e minister el a splica cu nan a haya diferente señal di por ehempel Banco Central cu a haci diferente investigacion riba e tamaño di e industria y impacto di cas y real estate. Pa gobierno nan a realisa cu ta importante pa tin un bon bista con e mercado ta hinca den otro cu e parti positivo y negativo. Mester bin cu un manera pa traha un maneho riba e tereno di AirBnb. Gobierno ta consciente cu tin hopi local cu tin inversion haci pa AirBnb y nan ta stimula esaki. Di otro banda gobierno ta consciente cu tin hopi hende di afo cu ta cumprando cas den e tipo di AirBnb.
Tin cierto preocupacion riba e cumplimento cu impuestonan cu ta toca pais Aruba y nan como gobierno ta atendiendo cu esaki di parti turistico. Minister Geoffrey Wever a splica tambe cu kier tin cierto regla den e industria y e parti economico tambe bo tin un interes un poco mas grandi cu ta full bo economia. Na Aruba mester tene cuenta cu tin hende cu kier tin nan propio hogar pero prijsnan ta hopi halto segun e mandatario. Bo por tin e pensamentonan aki, pero como gobierno pa bo actua mester tin un maneho y bo mester pone un bon base y mester compronde e materia. Bo por tin bo mesun pensamento, pero segun minister Geoffrey Wever esey no ta e manera responsabel pa goberna un pais.
E mes kier a laga sa cu e kier tin un prome estudio unda ta indica e hermentnan cu un gobierno mester tin y con por actua y kico ta e parti bon y parti malo di cada medida cu bo tuma. Esey tabata parti di e prome presentacion. A mustra e stakeholders cu esaki ta e prome presentacion di e prome parti di loke Buro Amsterdam a presenta na gobierno di Aruba. Tabata tin hopi pregunta critico den e sala. Minister Groffrey Wever a splica cu algun di e puntonan valido den sala tabata cu tin e sentimento cu ta contra AirBnb. Segun minister nan no ta contra AirBnb. Nan meta di e estudio no ta pa stop pero ta pa haya un bon bista y dicidi con ta traha riba esaki.
Tin hende ta bisa cu mester regula AirBnb pa local so. Tin pais cu ta bisa cu mester tin solamente un propiedad pa hende. Tin diferente cos cu por aplica y esaki ta e sondeonan cu gobierno ta haciendo e momento aki. Na Aruba nos no ta custumbra cu Policy Making den forma activo. En principio bo no ta trece stakeholders na mesa, pero den su caso e si ta pensa diferente. Tin biaha tin e sentimento cu kier bin cu regla sin cu ta dialoga cu stakeholders.
P’esey desde inicio segun minister Geoffrey Wever e kier participacion di Stakeholders y no tin ningun decision di gobierno cual direccion ta bay cu AirBnb. Ora tin un bon panorama y bon bista y tin un maneho formula, e ora ey por bin cu algo cu no ta afecta nos hendenan den forma negativo. E mester ta algo husto y cu ta traha bon tambe. E proposito ta pa analisa tur loke ta e preocupacionnan cu a bin dilanti y inventarisa nan y tin contesta adecua pa nan. Djey lo drenta e di dos fase, segun minister Geoffrey Wever.
