Diabierna, 22 di maart, minister Geoffrey Wever a bishita e instituto Wageningen University and Research pa explora e posibilidad di cooperacion pa pusha e desaroyo di agricultura comercial. Aplicacion di tecnologia innovativo pa produccion comercial di e.o. fruta y berdura ta esencial pa stimula agricultura comercial. Cooperacion cu e institutonan di conocemento ta parti esencial pa desaroyo di agricultura comercial como un pilar nobo di Aruba su economia.
Wageningen University and Research, un partnership entre Wageningen University y Stichting Wageningen Research, ta un instituto renombra mundialmente riba tereno di aplicacion di tecnologia innovativo di cultivo.
Minister Geoffrey Wever tabata compaña pa representante di Ministerio di naturalesa, Anko Koopmans, directora di Departamento di Asuntonan Economico, Comercio y Industria, Maria Dijkhoff-Pita, director di Utilities N.V., Anthony Rojer y director di Aruba Agri Development Company N.V., Jeremy Croes.
Durante e bishita Ria Hulsman, Regional Manager Latin America and Caribbeanm y diferente experto a elabora riba diferente aplicacion di diferente tecnologia innovativo pa stimula agricultura comercial na Aruba. Tambe e delegacion a ricibi un tour na “Netherlands Plant Eco-phenotyping Centre” (NPEC), unda a ricibi un splicacion amplio riba nan estudionan cu meta di saca afo e miho condicionnan di plantacion posibel pa saca maximo cosecha – un punto sumamente importante pa e factibilidad di agricultura comercial.
Agricultura comercial como pilar economico ta prioridad di Ministerio di Economia y Ministerio di Naturalesa pa asina diversifica Aruba su economia. “Nos ta consciente di e potencial grandi di agricultura comercial y ta nos compromiso pa busca cooperacion cu partnernan strategico cu tin e “know-how” relevante pa aplica esaki na un manera comercial y na beneficio di e industria agricola”, segun minister Geoffrey Wever.
