Minister di Husticia, mr. drs. Arthur Dowers, y Minister di Turismo mr. Wendrick Cicilia a reuni recientemente pa dialoga riba un colaboracion mas estrecho, hunto cu Aruba Hospitality Security Foundation (AHSF), cu como meta principal di sigui fortalece siguridad na Aruba.
Durante e encuentro a papia riba diferente posibilidad pa establece un colaboracion integral entre e dos ministerionan y AHSF. E intencion ta pa uni experencia, informacion y capacidad di diferente actor cu tin un rol den siguridad, pa asina por atende e retonan existente di un manera coordina y efectivo.
Aunke e colaboracion ta enfoca riba siguridad rond Aruba, den e caso aki a enfoca riba e area hotelero y turistico, considerando e importancia di e sector aki pa Aruba y e cantidad grandi di bishitante y trahado cu diariamente ta move den e zona.
E enfoke ta uno integral, den cual prevencion, intercambio di informacion, coordinacion y cooperacion entre Gobierno, sector turistico y partnernan den siguridad ta central. E meta ta pa fortalece no solamente e reaccion riba situacionnan cu por presenta, pero particularmente pa traha preventivamente y identifica posibel riesgo na tempo.
Cooperacion entre Gobierno, sector priva y organisacionnan cu ta activo riba tereno ta esencial pa logra resultado sostenibel.
E colaboracion cu AHSF ta forma parti di e esfuerso pa sigui fortalece un ambiente sigur tanto pa nos comunidad como pa esnan cu ta bishita Aruba.
Ministerio di Husticia y Ministerio di Turismo lo sigui traha hunto cu Aruba Hospitality Security Foundation pa concretisa e diferente puntonan discuti y establece un cooperacion structural y duradero, cu un meta comun: contribui na un Aruba mas sigur pa tur hende.
