Durante e ultimo dos lunanan, e cuerpo policial a perde shete polis. Di e shete aju, seis a entrega nan carta di ontslag y a sali for di servicio activo. A logra convence un di nan pa hala aden su carta di retiro y bolbe na servicio, mientras cu otro a solicita un traslado. Esaki ta loke cu Lito Lacle, Presidente di Sindicato Polis Aruba (SPA) a duna di conoce den un entrevista.
Esaki ta nifica cu, den solamente dos luna, shete polis a pidi ontslag, mientras cu dos personal civil tambe a entrega nan retiro for di e cuerpo policial. Un di nan a bay den luna di october y e otro ta bay den luna di november.
“E salida di coleganan ta un preocupacion grandi pa e cuerpo policial. Segun cifranan existente, durante e proximo cinco añanan, alrededor di 32 colega por sali for di e servicio. E cifra aki ta inclui e shete polis cu a pidi retiro recientemente. Ademas, tin mas polis cu ya a solicita pa sigui otro caminda profesional, pasobra nan no ta mira nan futuro den e cuerpo policial,” Lacle a indica.
Salario ta un di e problemanan mas grandi
Un di e problemanan mas grandi ta e nivel di salario. Polisnan ta cuminsa nan carera cu un salario relativamente abou, mientras cu otro camindanan profesional ta ofrece un salario mas halto.
Un agent den opleiding ta cuminsa cu aproximadamente 2.655 florin bruto, loke ta resulta den un salario netto di alrededor di 2.300 florin. Tin agentnan den opleiding cu ya ta considera pa laga e profesion y busca otro trabou.
E situacion ta bira ainda mas dificil pa un polis cu tin un famia. Pa un pareha cu dos yiu, e costo di bida ta considerablemente mas halto. Segun calculonan previamente menciona, un famia di cuater persona lo mester di alrededor di 6.000 florin pa por cubri e gastonan basico. Cu un salario netto di 2.300 florin, ta evidente cu tin un diferencia grandi entre loke un polis ta gana y loke e mester pa mantene su famia.
Tambe tin preocupacion entre rangonan mas halto
E problema no ta limita na polisnan cu ta cuminsa nan carera. Tambe tin preocupacion entre e rangonan mas halto.
Un inspecteur ta gana actualmente alrededor di 6.695 florin netto. Recientemente, dos comisario a haya un bevordering, cu un aumento di solamente 55 florin pa cada un. Segun e preocupacion expresa, esaki ta mustra cu cuerpo policial ta mal paga en comparacion cu e responsabilidadnan y exigencianan di e trabou.
E meta ta pa tene e polisnan den e cuerpo policial, pero pa logra esaki mester tin accion concreto pa mehora nan condicionnan laboral y, principalmente, nan remuneracion.
Beneficionan secundario tambe mester wordo revisa. Fuera di salario, tin tambe preocupacion tocante e beneficionan secundario. E kindertoeslag, por ehempel, ta keda na un suma relativamente abou, cu aproximadamente 55 florin pa mucha, mientras cu pa e prome mucha e suma ta alrededor di 250 florin.
Tambe tin e continuendiensttoeslag, cu ta rond di 80 florin y un compensacion di aproximadamente 200 florin pa cada shift. Segun e punto di bista expresa, tin varios aspecto di remuneracion cu mester wordo revisa pa por haci e profesion mas atractivo.
No solamente cantidad, pero tambe calidad
E preocupacion, sinembargo, no ta solamente tocante e cantidad di personal. Calidad di personal ta igualmente importante. E cuerpo policial mester por atrae y retene miembronan cu tin e formacion y preparacion necesario pa e trabou. E ta bisa cu colega cu ta drenta e servicio mester haya un bon opleiding y despues por keda den e cuerpo policial pa sigui desaroya su carera.
Actualmente, tin preocupacion special tocante e polisnan cu tin un opleiding MBO. Ora nan formacion wordo reconoce, nan tin oportunidad pa busca trabou otro caminda unda nan formacion por resulta den un salario mas halto.
E reto pa e cuerpo policial ta, por lo tanto, dobel: no solamente tin cu aumenta e cantidad di personal, pero tambe tin cu crea e condicionnan necesario pa conserva e miembronan califica cu ya tin. Sin bon condicionnan laboral, un salario competitivo y posibilidadnan di crecemento profesional, e riesgo ta existi cu ainda mas polisnan lo busca otro caminda den e proximo añanan.
