Dialuna 5 di october a inicia e trabounan di “vrees” di e caminda den e area di Sero Colorado, como prome paso pa renoba mas di 3.5 kilometer di e ruta. Despues di mas cu 30 aña, e caminda lo haya un capa nobo di asfalt, cu lo contribui na mas stabilidad y siguridad pa tanto nos hendenan como e turistanan cu ta bishita e area.
E proyecto a inicia riba peticion di Minister di Turismo, Transporte y Labor, Wendrick Cicilia y tin e sosten financiero di Aruba Tourism Authority (ATA). Cu un inversion di casi 3 miyon florin, e proyecto ta un ehempel concreto di con fondo di turismo ta bolbe den infrastructura y proyectonan cu ta beneficia comunidad.
Lo ehecuta e trabounan den tres fase:
– Fase 1: For di T-weg na Kaminis te na Anker.
– Fase 2: For di entrada di Seroe Colorado te na e bushalte di I Love Aruba.
– Fase 3: For di e subida na e bushalte di I Love Aruba te na e subida di Seroe Colorado Lookout Point.
Ta premira cu e trabounan di asfalt lo termina dia 23 di december 2026, net prome cu Pasco. Como siguiente paso, lo atende tambe e iluminacion di e caminda, pa sigui mehora e infrastructura den e area.
Pa Minister Cicilia, inverti den e camindanan aki ta inverti directamente den calidad di bida di e hendenan cu ta biba of ta bay traha den e area diariamente. Na mes momento, e inversion ta fortifica e producto turistico di Aruba, mehorando e acceso y e experiencia di bishitantenan den un area di importancia pa nos isla.
E proyecto ta refleha e importancia di haci cu e beneficionan di turismo ta yega na comunidad den un forma concreto. Door di destina fondo di turismo na mehoracion di infrastructura, ta atende necesidadnan di nos hendenan y ta sigui traha na e calidad cu Aruba ta ofrece como destino.
Minister Cicilia ta expresa su gratitud na Minister di Infrastructura, Rene Herde, pa su colaboracion y na Aruba Tourism Authority pa e sosten financiero cu ta haci e proyecto aki posibel. E colaboracion ta contribui na mehoracion di nos infrastructura, cu beneficio directo pa nos comunidad y e calidad di nos producto turistico.
