Gobierno di Aruba, conhuntamente cu Aruba Tourism Authority (ATA) y Dienst Openbare Werken (DOW), a anuncia un proyecto grandi di mehoracion di infrastructura cu lo ehecuta na Sero Colorado. E trabounan lo abarca mas cu 3.9 kilometer di asfaltamento nobo pa mehora accesibilidad den e area turistico y residencial aki.
Declaracion di Minister di Turismo
E Minister di Turismo a expresa e importancia di e inversion aki pa e comunidad y e sector di hospitalidad: “Awe ma intencion ta pa para akinan pa duna anuncio di un proyecto sumamente bunita, pero tambe spera pa nos comunidad. Manera cu Minister Herdé a bisa, lo cual cu nos ta bisa y priminti, nos ta cumpli. Nos ta para akinan pasobra nos ta cumpli cu lo cual cu nos a bisa.”
E caminda cu lo haya e mantencion nobo (“recap”) ta e entrada di Sero Colorado. E ruta aki ta cuminsa dilanti di Kamini’s, ta pasa cerca di e anker, ta drenta Sero Colorado te na e bushalte conoci cerca di e mural di ‘I Love Aruba’, y lo continua te na e punto di bista (lookout point) di Sero Colorado.
En total, e proyecto ta encera mas cu 3.9 kilometer di asfaltamento. E Minister a remarca cu e fondonan di turismo, cu ta fondo publico, ta wordo re-inverti directamente den solucion di e preocupacionnan di e comunidad. El a menciona tambe e apoyo di e miembronan di Parlamento, entre cual Stephanie Sevinger, kende a pidi atencion pa e proyecto aki.
Inversion y Salvaguardia di Fondo
Ronella Croes, CEO di Aruba Tourism Authority (ATA), a duna detayenan riba e proceso di planificacion y e inversion den e zona sur di e isla: “Nos a para pa proteccion den diferente aspecto. Nos vision ta un Aruba dushi pa biba y un Aruba dushi pa bishita. Tin hopi elemento pa traha y ta p’esey Aruba Tourism Authority a escoge pa ta envolvi den e proyecto aki.”
Croes a splica cu ATA a bin ta inverti den e area di Sero Colorado y San Nicolas pa medio di e Fondo di Desaroyo Turistico. Bao di e Plan Maestro di Sero Colorado, a inverti caba un total di aproximadamente 5.5 miyon florin den e zona aki. El a subraya tambe cu mantencion di tur e inversionnan y proyectonan aki ta presupuesta bao di e fondonan cu ATA ta maneha pa garantisa e sostenibilidad di e infrastructura.
Detayenan di trabou y ruta alternativa
Ingeniero Daryl Lue, Hoofd Infrastructuur di DOW Aruba, a presenta e detayes tecnico di e ecutacion: “E trabou aki lo tin un duracion di mas o menos 10 pa 12 siman. Como cu e caminda aki ta e ruta principal pa yega Secret Beach, Baby Beach y Rodgers Beach, nos mester a busca un caminda alternativa pa e trafico.”
Ruta Alternativa:
E ruta alternativa establece pa e bishitantenan y localnan lo bay via Fort Heuvestraat, yegando e bocht dilanti di Kamini’s, doblando na man drechi patras di e centro di rehabilitacion, pasando pa L.G. Smith Boulevard / Rodgers Beach area, pa despues yega bek na e crusada di parada di bus. E ruta aki tabata prepara den e ultimo lunanan.
Fasenan di Construccion:
· Fase 1: A cuminsa dia 5 di october y lo dura te cu 13 di november.
· Fasenan Posterior: E proyecto completo lo consisti di tres fase.
· Fecha Final Espera: E trabounan lo culmina rond di dia 23 di december.
E proceso lo encera raspa (“freeze”) e caminda existente y pone un capa nobo di 5 centimeter di asfalt. Despues lo ferve (lineamento) y instala e reflectornan di e caminda pa mayor siguridad vial.
DOW a haci un apelacion na tur automobilista, bishitante y residente pa tin hopi pasenshi durante e periodo di construccion y pa tene cuidou cu e empleadonan cu ta trahando riba e ruta.
