En conexion cu dia mundial di down syndrome, minister di asunto social, Rocco Tjon, a realisa un bishita na e fundacion Ambiente Feliz na San Nicolas awe p’asina e haya un recorido di e localidad. Segun Diantha Boukhouwer, miembro di directiva Fundacion Ambiente Feliz, a splica cu nan ta celebra e dia aki ya cu un di e metanan principal di nan fundacion ta pa crea oportunidad pa tur nan clientenan cu ta padece di down syndrome por participa, desaroya y socialisa den comunidad y alabes ofrece nan un vivienda.
Asina Boukhouwer a sigui splica cu Ambiente Feliz tin dos localidad, un na Santa Cruz cu yama Cas Curason y esun na San Nicolas cu yama Cas Briyante, cu tabatin su apertura september ultimo. Den un rueda di prensa e tempo ey, a splica y enfatisa e importancia pa tin un instancia manera Ambiente Feliz den e comunidad Arubiano. Esaki a inicia cu un caso lamentabel, den cual a bin haya un mucha muhe cu limitacion multiple cera den un ‘magazijn’ ya cu no tabatin ningun fundacion cu por a ofrece e cuido cu e tabatin mester. Cu esaki Boekhouwer a bisa cu nan ta sumamente contento cu nan ta haya sosten di gobierno p’e proyecto di Ambiente Feliz.
Na su turno, Ru Croes, presidente di Fundacion Ambiente Feliz, a splica cu n’e localidad na San Nicolas tin un total di tres cas, den cual cada cas por carga mas o menos seis cliente. Tin un cash abri cu tres cliente y cuater mas na caminda. Actualmente nan ta buscando personal cualifica pa por cuida e clientenan pariba, pues tin varios vacatura habri y kier habri e di dos cas pa prome di april. Croes a bisa cu pa fin di aña nan ta spera di por habri e di tres cas, mas cu claro, considerando nan poder financiero y e sosten ricibi pa gobierno.
Croes a bisa cu e demanda ta grandi y cu e listanan di espera di Ambiente Feliz como tambe di otro fundacion similar ta largo, pues e ta keda un problema di fondo financiero, pero awe a dialoga cu e minister concerni riba e necesidad p’e fundacionnan traha hunto pa, por ehempel, comparti fisioterapista of psicologo, p’asina haci miho uzo di e fondonan limita cu tin disponibel.
Pa un relato mas amplio lesa edicion di TREMPAN.
