Prijs di petroleo a subi y prijs di fleta ta subiendo drasticamente. Y un pais cu ta importa casi tur cos ta bay sinta e impacto ey enormemente, ta loke Minister di Asunto Economico mr. Geoffrey Wever a comenta.
El a agrega cu Aruba ta importa inflacion y esey ta e situacion vulnerabel cu nos ta den dje na mundo. Y como gobierno tin cu busca caminda cu ta posibel entre otro e ahustenan. Aruba ta un pais cu no ta produci petroleo. Mester compronde cu nos ta mara n’e prijsnan internacional. Tin un structura di prijs cu ta bezig ta revisa.
Segun e minister, ta haciendo diferente calculacion con pa haci diferente ahuste. Mester corda cu e momento aki, e situacion financiero di e pais no ta di tal forma cu por ehempel por yega baha un accijns haci den pasado. Esaki tin consecuencia miyonario pa presupuesto di pais Aruba. Ta algo cu ta bay den consulta entre e diferente departamentonan. Den e cuadro aki, minister Wever tin e tarea pa establece e prijs di gasolin.
A cuminsa haci tur preparacion y calculo pa mira con por trece un ahuste den e structura cu e prijs ta calcula. E deliberacionnan ey no ta cla ainda, segun e minister. Den e proximo dianan lo finalisa esaki y comunica debidamente na comunidad di Aruba.
Pa mayor cobertura lesa TREMPAN.
