Diaranson mainta minister Dangui Oduber tabat’ey presente durante un conferencia teni na Rodgers Beach, un area sumamente bunita y pa hopi aña lubida y bandona, cu inversion cu mester a haci pa percura pa mantene e infrastructura na su luga, no tabat’ey.
Durante di e conferencia a anuncia un otro proyecto pa San Nicolas, di entre otro e renobacion di e trapi cu ta den mal estado.
Na momento cu a drenta gobierno na 2017, tabatin un vision y un masterplan pa San Nicolas. Den esaki a inclui e proyecto di Baby Beach, fase 1 y 2. A inclui e renobacion di e oficina di turismo na San Nicolas. A bin cu e festival nobo cu a yama Island Fest y tambe kier a percura pa mehora y upgrade infrastructura di Rodgers Beach. Durante e prome periodo a percura pa entrega e proyecto di Baby Beach fase 1.
Compromiso ta pa sigui cu fase 2 den e gabinete actual. Tambe a percura pa e reapertura di e oficina di turismo na San Nicolas y asina cuminsa cu Island Festival. Sinembargo debi na e pandemia no por a continua cu esaki.
Conforme e maneho y e vision cu kier pa nos turismo, kier a enfoca e turismo niche, turismo di ‘low volume/high impact’, e turista afluente, e turista cu tin un entrada anual di 150 mil dollar pa aña y ora ta enfoca riba e grupo aki, nan tin cierto expectativa di e producto Aruba.
Semper a considera Aruba como un producto di calidad y pa por cumpli cu e expectativa cu e turista tin, en particular e turista afluente, mester keda haci inversion den nos producto Aruba.
A identifica diferente area caba basa riba e estudio, unda cu kier miho ‘visitor flow management’ tambe, y reparti tur e cantidad di turista cu ta haya den diferente area na Aruba.
Un di e areanan sigur cu ta mira y ta considera como un potencial enorme, sigur ta Baby Beach cu pa hopi aña, hopi turista ta bishita. Awo ta percurando pa e mehoracion di infrastructura, pa tin e facilidadnan pa e turistanan, pero awo tambe e enfoke ta pa Rodgers Beach.
Esaki ta inicio di ehecucion di e masterplan cual lo sigui pone atencion pa renoba e trapi, cu pa hopi tempo mester a renoba.
E ta den un estado hopi malo. Segun e mandatario, cu e renobacion di e trapi lo bay sigur duna e comienso na e futuro briyante cu ta mira pa San Nicolas.
Pa cobertura mas amplio lesa edicion di TREMPAN mañan.
