Gobierno a inicia e proceso pa introduci un fundacion di lotto nobo pa asina deporte por haya realmente loke e tin cu haya for di e e loteria aki, locual segun Minister di Deporte, Dangui Oduber a mustra no ta e caso actualmente.
E mandatario a mustra su indignacion cu loke ta pasando na e momentonan aki, no solamente cu directiva di fundacion Lotto pa Deporte pero tambe pa e financiado di e fundacion aki cu ta Canadian Bank Note cu no ta actuando contra di cosnan incorecto cu ta tumando luga den e fundacion aki.
“Tin situacion hopi fastioso na e momentonan aki, tin un polarisacion hopi pero hopi fastioso caba caminda como Minister mi no por ehecuta mi maneho despues di un aña cu a pasa, no por haci practicamente nada, nos man ta mara, nos pianan ta mara y nos no ta haya cooperacion for di e hunta di supervision, no ta haya cooperacion for di e director di fundacion lotto pa deporte.
Riba dje no tin transparencia, cuentanan anual no ta wordo entrega y ainda mi ta pendiente pa cuentanan anual di 2014, 2015, 2016 y 2017 mientras cu di otro banda ya caba mi a presenta cantidad di prueba con e director actual kende tabata presidente di hunta di supervision, a haci uzo di su propio compania di accounting pa duna servicio na e hunta di supervision, brinda un cantidad di otro servicio pa un suma di 300 mil florin.
Ta pruebanan cu mi persona a presenta durante un aña cu mi a haya e pruebanan aki caminda el a haci uzo di su compania pa duna conseho riba cuentanan anual cu te dia di awe no a wordo entrega.
Recientemente den parlamento mi a presenta un cantidad di prueba caminda por ehempel e director actual ta bay cumpra un pastechi y ta declara esaki, e ta bay cumpra un drop y ta declara esaki pa Lotto paga. E ta bay come na un Chines y ta declara esaki pa Lotto paga, e ta tene un dinnermeeting anochi y ta declara esaki pa Lotto paga.
Ta cosnan cu ta inaceptabel pa un director y mi no tin problema cu tin cierto beneficionan ora bo ta director cu ora bo ta bay un dinner bo ta entrega un declaratie y e fundacion den e caso aki ta cubri e gasto di esaki si e bay un business dinner.
Pero no por ta asina cu bo ta cumpra un pastechi, un refresco, merdia bo ta lunch na un Chines y tur esaki e ta declara y nos a haya pruebanan caminda e director actual ta declara un suma di 10.25 florin pa e fundacion di lotto cubri esaki.
Nos a yega na un situacion caminda nos no ta den combersacion at all cu otro, nan no ta brinda niun cooperacion, no tin transparencia, nos ta den Corte cu otro y mi a compronde for di abogado cu ta representa gobierno den caso aki mi persona como Minister, cu e decision di Corte lo ta den prome siman di februari.
Pero ya caba nos a cuminsa haci tur tramite posibel pa encaminda e proceso pa bin c’un fundacion nobo cu lo mester bay competi contra e fundacion lotto pa deporte.
Esaki pa motibo cu deporte no ta hayando atencion y djis pa duna un ilustracion kico ta e situacion na e momentonan aki ta cu bo tin Canadian Bank Note cu ta maneha lotto, nan ta paga e premionan, nan ta paga gastonan operacional, nan ta paga e personal y loke resta ta bay pa fundacion lotto pa deporte cu ta traspasa esaki pa Stichting Sportsubsidie Aruba cu ta reparti e placa bou di diferente federacion deportivo na Aruba,” Minister Dangui Oduber a declara.
E minister a sigui mustra cu e no tin cifranan ainda di 2018 pero a base di cifranan di 2017 el a mustra cu Canadian Bank Note a bende na Lotto, 54 miyon florin y loke deporte a haya deporte a haya na final di dia, ta 4 miyon florin y e ganashi di e grupo Canades tabata 11 miyon florin.
“Pami ya caba esey ta un ‘scheve verhouding’ ya cu deporte mester a haya 11 miyon florin y e grupo Canades cu obviamente kier gana placa, ta nan derecho tambe, mester a haya 4 miyon florin.
Esaki ta e cambio cu mi kier introduci tambe den e maneho di lotto nobo caminda deporte ta haya su fair share, deporte mester keda cu mas di e bolo aki cu ta wordo genera dor di benta di lotto, anto esun cu ta bay maneha e lotto y mi no sa ainda ken e ta si ta un compania local of uno internacional, pero nos ta bay un destaho publico y e compania tin derecho di gana placa pero e parti mas grandi tin cu bay pa deporte,” Minister Dangui Oduber a declara.
