E dia nacional di registracion pa vacuna contra COVID-19 a duna resultado positivo, si mira cu mas cu 1000 persona a registra riba e dia aki so. Esaki e minister encarga cu Salud Publico, Dangui Oduber a expresa riba su cuenta di Facebook.
“Awe casi 3 siman despues di e yegada di e prome batch nos por ta hopi satisfecho con e ta bayendo. Manera anuncia siman pasa nos a caba e prome batch di 11.700 vacuna. E prome nan cu a bin na remarca tawata e dunadonan di cuido y esnan riba 60 aña di edad,” Oduber a skirbi.
E ta hopi gradici y satisfecho cu Aruba a responde y ta respondiendo na e yamada di registra y vacuna. Diasabra ultimo a organisa un dia nacional di registracion pa brinda e oportunidad na esnan cu ainda no a registra pa por haci esaki na localidadnan cu ta duna e vacuna. “Nada mas y nada menos cu mas cu 1000 persona a registra riba un (1) solo dia. Aruba ya caba a surpasa 25% di su poblacion cu a registra pa haya e vacuna.”
Te cu awe Aruba a vacuna 10.519 persona di cual 8884 ta e e grupo di riesgo riba 60 aña di edad. Pa loke ta e cantidad total di registro, tin 26,811 persona registra di cual 11,447 riba 60 aña di edad.
Minister Oduber ta considera cu Aruba ta trendsetter na mundo di e manera con a organisa e campaña nacional di vacunacion. “Nos a haci uzo di innovacion, tecnologia y un tremendo staff di personal pa percura pa nos proceso ta mas facil y eficiente posibel. Nos kier facilita comunidad pa e proceso caba lihe pa nos por vacuna mas hopi hende pa dia. Actualmente ya caba nos por vacuna mas di 1000 persona pa dia y ainda nos no a yega nos capacidad maximo.”
Un biaha mas el a informa comunidad cu no mester preocupa pasobra tin mas vacuna na caminda y gobierno lo percura pa haci un peticion na gobierno Hulandes pa por manda mas vacuna considerando e speed y animo di Aruba pa wordo vacuna. Minister Oduber a gradici comunidad pa e participacion den e campaña nacional di vacunacion. “Hunto nos lo logra vence e pandemia aki. Ban sigui registra, ban sigui vacuna y ban sigui scapa bida. Den union, paz y harmonia nos lo prospera atrobe.”
E yamada ta keda pa registra via e Aruba Health of na un di e 4 MFA na Aruba. E siman aki e localidad di prik tambe lo ta habri pa registracion. Diamars, 9 maart 2021 e di dos batch di vacunan ta yega Aruba.
