Minister di Turismo y Salud Publico, Dangui Oduber, a anuncia durante un conferencia di prensa cu e proyecto di embeyecemento di un plasa cu nos lo yama “Welcome Festival Plaza” ta bay cuminsa cu su prome fase. Minister Dangui Oduber conhunto cu CEO di APA, Marc Figaroa, a presenta e masterplan, cu tur e proyectonan di Aruba Ports Authority N.V. (APA) den progreso pa 2024 y 2025.
Minister Dangui Oduber a splica cu tin vision den APA su masterplan pa sigui diversifica e entradanan pa APA y pa Aruba su producto por keda competitivo compara cu otro islanan den Caribe. E masterplan di APA ta enfoca ariba proyectonan manera Port City, Ex-edificio di DOW, e Cruise Expierence Development Plan y Barcadera Business Park.
Tur e proyectonan aki sigur lo bay crea oportunidadnan nobo, crea cupo di trabou y lo bay trece mas entrada pa asina por sigui inverti den nos turismo.
Ademas, e proyecto di Welcome Festival Plaza lo bay ricibi un embeyecemento completo cu lo inclui un area recreativo, iluminacion, sombra pa proteha contra solo, diseño de paisahe cu hopi mata y lo bay drecha e estetica di e kiosconan y lo percura pa tin baño renoba pa mehora e experiencia pa e turista- y localnan.
APA su masterplan ta keda desaroya conforme e vision cu Ministerio di Turismo tin pa asina crea un bon experiencia y cumpli cu tur e necesidadnan di nos turista y bishitantenan di crucero.
Minister Oduber a menciona cu e ta contento cu e gerencia di APA pa e bon sinergia di trabou y tambe departamento di gobierno pa e bon cooperacion pa asina por desaroya un area completamente embeyece y transformando pa crea un ambiente di bon bini tropical pa e bishitantenan.
