E presion den Cuerpo Policial ta aumentando cada ora mas. E disgusto bou di e Polisnan ta creciendo y ta tur cos ta mustra cu por spera escalacion den e siguiente oranan. Specialmente e departamentonan di Recherche y Polisnan uniforma ta uni pa demostra nan desaprobacion den e forma con politica ta penetrando den e trabou diario di husticia.
For di Cocolishi Building a drenta informacion cu Minister Andin Bikker cu tabata di biahe algun dia na Boneiro pa celebra apertura di un prizon nobo, ta biniendo Aruba urgente pa purba evita un accion di Cuerpo Policial. E ta consciente di e disgusto y e mandato cu e sindicato di Polis a haya e siman aki di su miembronan.
Alto Comisario Andrew Hoo, nombra apenas algun luna pasa dor di Minister Andin Bikker ta confrontando un reto grandi aki. El a topa un Cuerpo di Polis desuni, pa via di metemento di politica mes y cu awor ta determina pa caba cu e fenomeno nobo aki awe mes.
Minister Andin Bikker a manda yama un reunion urgente cu Mando Policial y cu dirigentenan di SPA den un esfuerso pa calma e tension policial aki. Polisnan no por biba cu e situacion cu tin 6 Polis suspendi pareu y dos encarcela na e momento aki.
Banda di esey, Polisnan a pasa dos mocion relaciona cu e presion cu Minister Bikker ta poniendo pa firma protocol cu Hulanda pa pasa departamentonan di droga, UGC, CID, OT y InfoDesk bou di Recherche Samenwerkings Team (RST). A instrui directiva di SPA cu si Minister Andin Bikker no para e proceso di protocol aki den 2 biaha 24 ora, cu lo pidi pa tur Recherche di KPA regresa Polis bek y cu tur otro Polis cuminsa un accion morocoy riba caya.
Keda pendiente pa mas informacion awe tardi for di Bestuurskantoor. Mester menciona di otro banda cu AVP a manda yama su militancia awe 7:00pm na Cas di Partido tambe pa e mesun tipo di tensionnan asina y no por descarta cu lo marcha bay Bestuurskantoor despues, como sosten na e Polisnan y periodistanan cu awor ta wordo persigui dor di e Gobierno na mando.
