Prome Minister saliente mr. Mike Eman ta keda e politico mas popular y cu mas voto riba nos isla den e eleccion di dia 22 di september ultimo. El a logra no menos cu 7822 voto riba su nomber, cu ta mas cu dobel di e siguiente politico cu mas voto, esta Evelyn Wever di MEP cu 3503 voto y tambe Ricardo Croes di RED cu 3359 voto riba su nomber.
Mike Eman a inicia su carera politico den partido AVP na aña 2001, unda el a logra 3933 voto. Apesar cu e tabata number 3 el a haya mas voto e tempo ey y a bira lider di e partido. Desde 2005 e tin e puesto di Votegetter, hasta den e eleccion ey unda MEP a gana eleccion, toch Eman tabata bon pa 6188 voto. Na aña 2009 cu AVP a gana cu 12 asiento pa goberna nan so, Mike Eman a conta 8068 voto riba su nomber y a sigui crece na 2013 pa 8222 voto. El a conoce un caida awor di 400 voto y a baha na 7822 voto riba su nomber.
