Durante un reunion completamente yen na Cas di Partido algun anuncio grandi tabata haci door di e lider di Partido Mike Eman. Lider di AVP y Minister-president Mike Eman a anuncia awe anochi dos decision historico y di gran importancia cu ta marca e comienso di un capitulo nobo pa AVP y pa Aruba. Eman a anuncia cu durante e Congreso di Liderazgo di AVP na september 2026, e lo entrega liderazgo di partido na un generacion nobo. Ademas, el a comunica cu e lo termina su cargo di Minister-president di Aruba na 1 di januari 2027.Cu e decision aki ta cera un epoca den cual Eman a lidera AVP pa binticinco aña, y a ocupa cargo di Minister-president durante tres periodo diferente di gobernacion.
Mike Eman su carera politico lo bay den historia cu e recordnan grandi: Mike Eman ta e votegetter mayor di Aruba desde Status Aparte y a hiba partido AVP na 13 asiento, cu ta otro record electoral desde Status Aparte. Su logronan den gobernacion ta keda graba den historia, riba tereno economico, social y infrastructura, cambionan grandi tabata realisa. Su vision pa Reino Hulandes ta keda esun mas inspirativo di tur tempo. Su amor pa traha pa esnan di menos recurso no conoce igual. Un lider cu vision y pasion cu lo ta un ehempel pa e generacionnan cu ta bin. Di momento cu e a drenta politica y te awe ta un bastion di speransa. Su resultado electoral na votonan preferencial na number 29 probablemente tambe lo keda un record pa hopi tempo, dificil pa iguala.
Den un discurso marca pa gratitud, reflexion y confiansa den futuro, Eman a papia tocante responsabilidad cu liderazgo ta hiba cu ne. Den e siguiente 6 lunanan Eman a enfatisa cu e ta spera di por termina algun proyecto social importante pa esnan mas vulnerabel den nos comunidad y tambe pa e barionan mas vulnerabel.
Den su discurso e a para keto na aumentonan grandi pa pensionadonan cu a keda realisa como compromiso importante di AVP durante eleccion. Tambe aumento di bijstand y pakete di remedi cu ta completa. Eman a comparti informacion tambe riba e reciente decision pa aumenta reparatietoeslag pa esnan cu salario bao di Afl. 2500,==. Eman a expresa cu den e siguiente 6 lunanan e ta spera tambe cu por yega na un acuerdo cu partnernan social riba acopla salario minimo na “bestaansminimum”. Actualmente salario minimo ta Afl. 500,== bao di bestaansminimum. E proposicion ta pa den tres aña e suma di salario minimo ta acopla na “bestaansminimum.” “Ya nunca mas un persona cu salario minimo tin un deficit presupuestario pa por alcansa un bida husto”. Tambe Eman lo enfoca pa hunto cu colega Mervin Wyatt-Ras pasa den Parlamento e ley cu nan a manda awor pa Raad van Advies pa duna famianan cu mucha special un ayudo financiero. Den e mesun contexto a anuncia e aumento di bijstand pa gehandicapnan cu Afl. 100,== pa luna pa yuda cubri aumento di costo di bida. Tambe Eman a bisa cu e ta spera di por duna inicio na MFA San Nicolas durante e 6 lunanan aki y renobacion di Betarixschool y Julianaschool. E a mustra tambe riba e mehoracion cu a realisa pa docentenan di school
Eman a cera e anochi enfatisando cu liderazgo berdadero no ta consisti solamente di sirbi y construi, sino tambe di prepara na tempo un generacion nobo pa tuma e responsabilidadnan di mañan.
“Ningun lider no ta mas grandi cu e proposito cu e ta sirbi. E fortaleza di AVP semper tabata cu e ta mira mas aya di personanan y generacionnan. Eman a dedica un momento pa reconoce e hopi personanan cu a sostene y a compañe durante su carera politico: miembro di partido, boluntario, dirigente, representantenan electo, ministernan, familiarnan y, mas cu tur, Pueblo di Aruba.
El a expresa su profundo gratitud pa e confianza cu a wordo deposita den dje durante tanto aña y a bisa cu e ta un privilegio extraordinario pa por sirbi su pais durante periodonan di gran reto y momento importante den desaroyo nacional di Aruba.
Na mes momento, el a enfatisa cu su traspaso como lider di partido na september y como Minister-president final di aña no ta nifica un despedida di e idealnan na cual el a dedica su bida.
“Mi responsabilidad pa Aruba no ta caba cu un cargo ni cu un titulo. Mi amor pa nos pais, mi fe den nos pueblo y mi conexion cu AVP ta keda mescos. Despues di 1 di januari 2027 tambe, mi lo sigui dedica mi curason y alma na partido, na nos comunidad y na bienestar di Aruba.”
Cu e Congreso di Liderazgo na september y e transicion di cargo di Minister-president na 1 di januari 2027, AVP ta tuma conscientemente un paso den direccion di relevo generacional, manteniendo fiel na e balornan cu a guia partido desde su fundacion: servicio, responsabilidad, solidaridad y amor pa Aruba.
