E topico di matrimonio di mesun sexo ta un topico delicado. E tin e pais dividi, pero tambe famia y hasta e partidonan politico. Ta mira e division aki mas bien den e partidonan mas grandi, sa yama nan; partido tradicional esta AVP y MEP. Apart di ta e partidonan mas grandi, ta e partidonan cu mas hopi aña di existencia y ta e pilar di e movecion politico pa hopi decada caba.
E topico actualmente ta un batata cayente den coalicion di MEP y RAIZ. MEP purbando tur manera di tarda pa no yama e reunion riba matrimonio di mesun sexo caminda e propio RAIZ t’esun cu ta pusha pa e ley hunto cu Accion 21. Un di e partidonan cu tabata masha keto riba e topico aki ta AVP.
Durante e noticiero Enfoke, a puntra lider di e partido di AVP, mr. Mike Eman riba su punto di bista y posicion pa cu e topico aki. Con e lo vota hasta p’e ley. Eman, na un forma masha habri a contesta bisando cu e personalmente ta contra pero mayoria den su partido ta PRO.
“Ami ta hopi cla riba esaki”, durante hopi momento den su partido a ripara cu tin dos liña. A yega na e acuerdo cu tur ta liber y cada un miembro di parlamento mester vota con nan ta desea y no riba un liña di partido. No obstante cu e ta contra, e ta recorda tur riba e sentimento di comunidad. Locual Eman ta sinti ta cu e temanan aki tin cu atende cu ne pero no ta sinti necesario pa fors’e. Mas bien lage pa e evolucion di e sentimento di comunidad. E discusion di matrimonio di mesun sexo no ta saludabel ni pa esunnan contra y tampoco esunnan PRO.
