Despues cu Ministerio Publico a duna ordo pa detene Anthony Geerman awe di AruTram, mesora riba red social a sali un alegacion cu e ta campañado di Mike de Meza. “Tin hende no ta siña nunca mas”, asina e actual Parlamentario di AVP a reacciona. El a conseha tur e Mepistanan pa bay busca e culpabel den nan propio coalicion!
“E ta den Boso team mes! No hinca ami den boso baina”, asina ex Minister Mike de Meza a subraya. Ta obvio cu e ex mandatario ta distancia di e insinuacion cu e sospechoso lo tin algo di haber cune. Parce cu a tuma e sospechoso den servicio di AruTram na december 2012, bou maneho y responsabilidad di e tempo ey Minister Otmar Oduber.
Mas leu den su reaccion, Mike de Meza a sigura cu: “Mike no a pone ningun hende den Arutram y tampoco AruParking y tampoco den Arubus. Tur hende sa ken ta Mike su campañadonan. Bay investiga ta di ki tempo tin bomboshi y ken a bin descubri e fechoria y a tuma accion”.
Locual mas ta hala atencion ta cu por conclui cu ta e propio Minister de Meza a descubri e asunto aki y a ordena un investigacion. Tambe el a señala cu “Ainda tin hopi mas na caminda! Ta bo lider a pone screening un banda y a convence Gobernador pa firma”.
Riba red social hopi ta opinando cu ta obvio cu Formador e uza screening pa un Minister so y pa otro, cu no ta di su partido, no a aplica e mesun man estricto. Cu e detencion di awe ta habri e prome pandora box, di e tantisimonan na caminda.
Na final Mike de Meza, cu awendia ta miembro di Parlamento di AVP a termina bisando “Keep the popcorn popping”, indicando cu tin hopi mas di e tipo di acontecimentonan asina na caminda.
