Raad van Advies a conseha parlamento y gobierno pa laga un gobierno bay. Aunke segun parlamentario Miguel Mansur di Accion 21, durante di un entrevista den Enfoke, e no a spera cu e conseho aki lo ta asina cla y directo. Nan ta bisa cu LIM mester ta revisa den su totalidad.
A bay mas leu y bisa cu e reparticion actual ta pone e existencia di e gobierno na peliger. Tin tres ministerio cu ta representa 3% di e presupuesto, si asumi un presupuesto di 1.3 biyon. Tin tres minister responsabel pa 39 miyon di e presupuesto aki. Esey ta e base riba cual nan ta bisa cu mester laga un minister bay.
E bon noticia cu prome minister tin, fo’i algun fuente, segun e parlamentario, cu tin iregularidad enorme na Arubahuis. Por ta esey ta un posicion cu por habri y schuif un di e ministernan manda Hulanda.
Aunke tin di bisa cu e analisis di Raad van Advies ta devastador. Ta un momento crucial pa Parlamento, segun Mansur. Specialmente p’e presidente di Parlamento, kende ta un persona preocupa bao di COHO-rijkswet caminda cu lo marginalisa e parlamento.
Awo ta cuestiona si tur miembro di parlamento a haya conseho di RvA. Ningun di nan cu ta haciendo nan trabao y a lesa e conseho, por bay cu un bon consenshi y aproba e LIM den e forma actual. Segun Mansur e no ta sirbi pais Aruba. RvA ta cla con pa reorganis’e y ki ministerionan mester bay cu otro. RvA tabata increiblemente critico riba e ministerio di minister Arends y a indica cu no ta mira ningun corelacion entre e diferente carteranan. Nan tabata critico tambe riba e ministerio di Endy Croes y a indica cu e splicacion tabata hopi breve y sin contenido real, segun Miguel Mansur.
Pa un cobertura mas amplio lesa e edicion di TREMPAN di mañan.
