“E gobierno aki mester a bay cas dia bieu,” ta loke Miguel Mansur, lider di fraccion di Accion 21 a comenta durante un entrevista den Noticiero Enfoke diaranson merdia.
El a sigui splica di parti di minister Arends, el a drenta politica cu bon intencion, pero blunder tra’i blunder por mira.
Por mira Parkietenbos, RWZI, awo Embassy Suites y Aruparking. Segun e politico, ta un indicacion, por ta di e situacion entre e dos partnernan di coalicion, e desconfiansa cu tin entre nan y pakico nan ta sinta wanta, no sa, pero pa bienestar di pueblo, e no ta.
Por corda ainda cu Marisol Tromp hunto cu Mansur ta sinta na Starbucks, por a mira esaki den un potret riba Facebook. El a skirbi cu politica lo tabata diferente si Arends a join e reunion.
E tempo ey el a invita Arends y e no a bin. El a manda un contesta hopi straño. Basicamente e anochi di eleccion Mansur a haci e yamada p’e tres partidonan independiente pa sinta cu otro prome cu bay papia cu cualkier di e dos grandinan.
Tromp mesora a compronde e importancia y e oportunidad di e invitacion y el a confirma cu e ta interesa pa por sinta y a invita Arends pa join. El a contesta cu mientras ta sintando cu nan no a haya e mensahe. Mansur a saca copia di e mensahe y a mand’e pe.
Tabatin un chens pa forma un bloke cu e tres partidonan independiente y un gobierno no por forma sin e cinco asientonan ey. E ora tin un chens pa realmente bin cu cambio den nos sistema democratico y economico cu mester pa cambia e destino y trece comunidad financiero pa cada un Arubiano.
Desafortunadamente mayoria di RAIZ, pasobra tabatin otro miembro si tabata kier pa sinta, kier a core drenta gobierno. Ta di compronde asina nan lo a haya dos minister na luga di uno.
Na final, loke por mira di e trayecto di cooperacion entre RAIZ y MEP ta cu na cada punto MEP ta bezig ta nek nan. Nan a kere cu despues di Eagle LNG, MEP lo respeta nan. Awo por mira un situacion cu cada oportunidad cu ta existi, MEP ta bezig ta humilia nan.
MEP lo tumba gobierno prome cu RAIZ haci esey, pa bisa berdad, si esey sosode, Mansur a bisa convenci.
