Representante di Headlines Group, cas editorial di 24ora.com y tambe matutino digital TREMPAN a trece un topico dilanti na Prome Minister Evelyn Wever-Croes cu fin di siman por a tuma nota cu Minister Rocco Tjon no ta riba e mesun linea cu Minister Ursell Arends.
Por a nota e falta di comunicacion riba diferente tema na varios ocasion, entre otro e caso di e proces-verbaal di Nigel Maduro na unda a trece dilanti segun e recherche lo a señala cu aparentemente ta Bureau di Minister Tjon lo a instrui pa persigui Maduro riba su accionnan di “ no more hotels”.
Espinoza a indica cu a combersa recientemente cu Minister Arends cu di su parti a bisa cu lo bay papia cu su colega Minister Tjon. Na salida di Minister Tjon pa Hulanda durante weekend, e mandatario di husticia a comenta cu su persona no a reuni cu Minister Arends, segun e reportero a señala cu asina tin hopi incidente a tuma luga y bay ta acumulando. A puntra e prome mandatario con su persona ta wak e desaroyo encuanto incidentenan pa falta di comunicacion.
Wever-Croes a cuminsa contesta Espinoza mustrando na su persona cu “e ta hopi creativo, si dos minister no logra papia cu otro, bo ta haya esey un incidente ?….. Mi ta bisa bo….esey ta pasa tur dia, pasobra nos tur ta hendenan sumamente ocupa, y mi ta kere Minister Arends na su luga e tin hopi reto cu su ministerio”.
E mandatario a sigui contesta si su persona lo bay puntra Arends un cos interno di Minister Tjon anto Arends no a haya chens di papia cu Minister Tjon prome cu e la biaha, esey no ta incidente esey ta cosnan cu sa pasa. E politico a añadi cu “kisas berdad no ta tur ora pasobra cu Marko (e reportero) a puntra, nos tin cu core puntra…..NO…..Minister Tjon tin su ministerio y a contesta boso, y mi ta bisa bo cu esey ta berdad, no ta duna instruccion ken pa persigui y ken no ta persigui, nos gobierno no ta traha asina.”
Pa mas lesa TREMPAN.
