Ban bek den tempo un rato y imagina bo para na aña 1948 na nos isla Aruba. Di dos guerra mundial a caba di termina na 1945 y unda no tabatin tin hopi habitante y no tabata existi celular, ningun clase di medianan social,manera Facebook. No tur cas tabatin coriente y asina mes 2147 Arubiano cu curashi e tempo aya a logra bini hunto y firma un peticion pa entrega na madre patria a traves di Shon A Eman, vocero di e 2147 Arubiano balente, kende a logra haya audiencia cu Reina Wilhelmina pa haci entrega di e firma nan cu Aruba kier ta “baas den su mesun cas”. Esaki tabata e comienso di e lucha di Status Aparte a cuminsa cu e firma di e 2147 firmanan aki. AVP e tempo aya bou di liderazgo di Henny Eman y Shon A Eman a cuminsa cu e lucha na unda Betico Croes a join AVP pa nan hunto continua e lucha aki.
E morto repentino di Shon A Eman na 1967 a laga Aruba den shock y Betico Croes como politico hoben den AVP a purba di tur manera pa bira lider di AVP, pero como un hoben politico no a logra convence esunnan cu tabata t’ey hopi tempo caba, Betico no a y nunca tabata den conflicto cu ningun Eman pa bira lider, pasobra ningun Eman tabata den partido mas e tempo aya. Y casi 4 aña despues di morto di Shon A Eman ,Betico Croes hunto cu e hobennan nan di partido AVP a lanta Partido MEP na aña 1971 y tabata un nomber di un partido existente na Venezuela cu tambe tabata yama MEP (Movimiento Electoral Del Pueblo). E partido, funda na aña 1967 na Venezuela como un partido di izquierda ,un partido socialista di Venezuela cu te awe e partido ey ta existi apoyando awo e chavismo na Venezuela.
Ta lamenta cu Partido MEP a dicidi cu na cada celebracion di nos dia nacional no ta duna honor na e 2147 Arubianonan balente cu pa mi ta nos heroenan di e comienso di e lucha di status aparte. E fecha di 18 di maart cu ta e dia cu Betico Croes mes a scoge pa duna honor na e 2147 Arubianonan cu a a traves di Shon A Eman a entrega e peticion na Reina Wilhelmina pa Aruba haya su” aparte status “ ariba e fecha di 18 di Maart 1948.
Pa esunnan cu ta hoben den politica, sea cu bo ta aspira pa subi lista,sea bo ta bay vota pa prome biaha, conoce bo historia bon, google of busca un buki na nos biblioteca nacional pa bo sa e historia completo di e lucha di Status Aparte. Ban duna honor na e 2147 firmantenan, Arubianonan nan balente cu den un tempo dificil a cuminsa cu e lucha di status aparte,sea cua color politico cu bo ta,no laga ningun hende ,pasobra nan ta un color awo y kier haci comosifuera cu no a existi un lucha cu a cuminsa den un Partido politico cu no ta color geel. Pasobra e lider inmortal di partido MEP mes tabata politico di AVP y kier a bira lider di AVP. Pa esunnan cu bo ta tende nan cu gritonan di a nace geel y lo muri geel, sin importa con malo e pais aki ta bayendo,mester sa cu Betico Croes mes no a nace ni geel, ni berde, pero a cuminsa su carera politico si den cuna berde, politicamente papiando, pasobra nos tur aki na mundo no ta nace geel of berde, pero nos ta nace como yiunan di Dios y nos ta muri tambe como yiunan di Dios.
Historia politico di Aruba a cuminsa hopi prome cu MEP y MEP kier pa pueblo recorda historia politico manera cu nan kier y nos tin hopi mas heroenan cu den pasado cu tambe a lucha pa nos isla,ta poco mas y nan lo bisa bo tambe pa no worry ken a descubri Aruba. Aruba ta rico den su historia, for di su descubrimento, di oro, fosfaat ,aloe, refineria y turismo. Ta hopi Arubiano balente a contribui cu e fundeshi di Aruba, pa nos generacionnan di awe por disfruta di nos isla. Y sigur e 2147 Arubianonan tambe ta forma parti di e fundeshi fuerte di nos structura estatal. Un cas, nos cas no a cuminsa na e dak, pero semper e ta cuminsa na e fundeshi.
Mi ta termina cu un dicho di un otro Arubiano grandi cu Aruba a produci ,un escritor y mucho mas.”’Berdad nunca a perhudica ningun hende ,ningun causa ni ningun nacion.’”
