Diamars mainta a tuma lugar eleccion pa 3 miembro nobo pa e directiva di Camara di Comercio di Aruba. Tabata tin un lugar pa un representante pa “Klein Bedrijf” y dos representante pa “Groot Bedrijf”. Despues di a conta tur e votonan valido a resulta cu e sigiente personanan ta logra drenta e directiva di Camara di Comercio.
Pa Groot Bedrijf ta trata di Satish Daryanani. Satish ta un empresario conoci cu hopi aña di experiencia y den pasada a fungi caba como miembro di e directiva. Tambe Wanda Broeksema a keda escohi pa drenta e directiva. Pa Broeksema esaki ta su promer biaha den e directiva. Broeksema ta conoci di e fungi den posicionan clave na Digicel, Balashi, Elmar y actualmente bek na Digicel. Pa loke ta “Klein Bedrijf tabata tin un puesto disponibel. Pa e puesto aki Lindy Croes a haya mayoria di e votonan y asina ta drenta e directiva. Croes ta un hoben entrepreneur cu ta hopi activo den e mundo empresarial pa su mesun negoshi como tambe su esfuersonan pa rebiba Caya Grandi.
Locual a resalta ta cu e aña aki e candidatonan a hiba un campaña bastante activo tanto den media tradicional como medionan electronico. Di e comerciantenan cu a deposita nan voto por a tende cu durante cierto orarionan mester a warda den rij un tiki largo pa vota. E deseo ta cu den futuro nan por deposita nan voto electronicamente.
