Michael Williams na gobierno: “E beerput di corupcion ta bay habri awo”

Michael Williams y Jan de Ruijter a acudi na Corte unda a entrega oficialmente un keho contra e abogadonan Hendrik Croes, Anthony Ruiz y Iris Wever. Esaki tin di haber cu loke a pasa durante nan ultimo conferencia (10 di november) cu un empleado di e Bufete a sali “cobra” de Ruijter den e LIVE di un conferencia. Si e debe ta berdad of no, segun de Ruijter, e ta un violacion di e regla di secrecia di un Bufete di Abogado.

Williams a bisa cu Stichting Nos Aruba a entrega e keho na Tuchtcollege contra e bufete ya menciona. “Mi ta kere cu esaki ta cuminsamento di locual cu nos tin di haci pa para tur locual nos ta kere ta bay robes na Aruba.”

Tambe nan a haya bishita di Deurwaarder pa un caso sumario cu e mesun Bufete a cuminsa contra Fundacion Stichting Nos Aruba y Jan de Ruijter. E ta relaciona cu e denuncia cu nan di e fundacion a haci riba otorgamento di tereno, deal den permisonan di cannabis y pa motibo cu a menciona nomber di e yiu di prome minister, e mandatario y di Hendrik Croes. Tratamento di e caso lo tuma luga dia 4 di december.

Williams a bisa cu nan a lanta e Fundacion y a haya apoyo pa para tur bagamunderia, sin importa cual partido ta na mando. P’esey nan ta cla pa bay Corte, pa e caso cu a cuminsa contra nan. El a sigura cu e of e fundacion no tin nada contra ningun hende, pero nan tin problema pa e sistema troci cu tin na Aruba. “Nos kier pone un paro na e corupcion cu tin … Mi a vota pa MEP, pero mi lo no tolera nada malo.”

Ela menciona cu Ricardo Croes tabata kier a bende Gobierno abou y p’esey el a acerca e fundacion seis luna pasa. Den e encuentro nan dos di e fundacion tabata presente y tambe un persona di prensa. Esaki a tuma luga na Alhambra y e encuentro aki tabata graba. Pa e motibo ey e tin e grabacionnan cu bos di Croes haciendo acusacionnan di con ta haci e negoshi di Cannabis. Hasta el a yama e parlamentario di RED como un “chichi”. “E beerput aki ta bay habri y nos lo bini dia 4 di december cu suficiente testigo, lo cita nan tur como testigo pa bini den e caso aki dia di e tratamento di e caso.”

Loading…

Taking too long?

Reload document

| Open in new tab

Download [17.85 MB]

Jan de Ruijter, tambe presente, a splica cu nan conferencia tabata dilanti Corte pa motibo cu nan a entrega keho contra e Bufete di Hendrik Croes y Ruiz pa violacion di reglanan di ordo di abogado.