En conexion cu dia internacional di hende muhe, Parlamentario Mervin Wyatt-Ras ta felicita tur hende muher. Segun e parlamentario desde 1911 ta celebra dia di hende muhe. Ariba e dia aki un gran cantidad di actividad ta ser organisa mundialmente pa dedica atencion na logronan economico, social y politico di hende muher.
Si tuma nos pais por bisa cu sigur tin logronan, segun e parlamentario. Den añanan setenta a cambia ley pa haci posibel cu hende muhenan casa por keda traha den gobierno. Na aña 2003 a introduci cambio di ley di stalking y e cambio di nos Codigo Penal pa proteha hende (mucha) muhe contra di abuso sexual, tambe den matrimonio. Esakinan ta leynan cu Wyatt-Ras mes a traha riba nan. Na aña 2008 a cambia diferente ley pa amplia e verlof di embaraso y parto pa 12 siman y a bira posibel cu e mama trahado despues di parto por cria su baby cu lechi materno na pia di trabao of cu e por kolf lechi na trabao pa por cria su baby. Ademas e hende muhe a logra haya aumento di salario ora di malesa. Esakinan ta cambionan di ley na cual Wyatt-Ras a traha como iniciado. Na aña 2011-2012 a cambia leynan di labor cu ta beneficia e hende muhe, specificamente pa loke ta trata acoso sexual.
Ariba tereno di enseñansa por nota cu mas mucha muhe ta caba scol di nivel mas halto en comparacion cu mucha homber y por nota cu mas mucha muhe ta bay den exterior pa studia. Notabel ta cu hende muhenan mas y mas ta ocupando puestonan halto den nos comunidad. Por menciona huesnan femenino, gobernadora interino, ministro presidente y presidente di Parlamento, cual funcion Wyatt-Ras mes a ocupa na 2 ocasion. Awendia tin mas miembro di di parlamento femenino. Di 21 miembro actualmente tin 7 hende muher, esta 30% ta hende muher. Den constelacion anterior tabatin 8 hende muher loke tabata encera 38 % di extotal.
Tin un adelanto, semehante na e esun mundial, cu mas y mas hende muhenan ta subi mercado laboral. E ley di kindercentra cu a ser pasa na aña 2017 sigur lo yuda cu mamanan ta sinti nan mas trankil ora nan ta traha. E hende muher ta traha mas den e.o. sector di cuido y salud, enseñansa, hoteleria y servicio financiero.
Por nota sin embargo cu e salario, en especial den sector di hoteleria, di hende muhe ta mas abou cu di hende homber y hasta pa trabou igual, esaki a sali for di un investigacion dor di departamento di labor na aña 2011.
Ademas te ainda tin un cantidad di hende muher ta biba den situacionnan desfavorabel di abuso y maltrato y cu e situacion aki ta ser manteni door di e mentalidad cu e hende muhe ta sinti’e inferior y dependiente di e hende homber.
Segun Wyatt-Ras enseñansa tin un rol importante den educacion di e hende muhe y tambe den dun’e tools pa e fortifica su imagen propio y independencia. Wyatt-Ras ta considera cu nos tin un buro netamente pa hende muhe y ta mira alabes cu nos tin instancianan social y un fundacion pa hende muhe den Dificultad pa proteha hende muhe contra di maltrato y abuso. Segun e parlamentario gobierno y sector priva tin cu traha hunto pa sostene e mama y tata trahado y esnan vulnerabel pa e por ta mas fuerte den nan rol como educador. Ademas tin cu explora e posibilidad pa manera na otro pais manera Hulanda por tin e posibilidad di traha durante parti di dia so (deeltijdarbeid) pa asina e mayor cu scoge pa esey por ta mas tempo cu su yiunan. Na Aruba ainda nos no ta asina leu. Pues nos tin ainda varios punto pa sigui lucha pa trese cambio y progreso.
