Den un entrevista Parlamentario drs. Mervin Wyatt-Ras a trece dilanti cu dialuna awor lo trata den parlamento e ley cu di normanan pa cu “topinkomens”, esta e normanan pa cu e entradanan di funcionario den cierto entidad gubernamental, semi-gubernamental y e fundacionnan.
E ley a drenta Parlamento dia 3 di november 2021. A reuni porta cera cu diferente entidad pa nan opinion encuanto e ley aki cu lo afecta no solamente salarionan halto, sino alabes esunnan cu tin un salario mas abou. Entre otro a reuni cu WEB NV, Elmar, SETAR NV, sindicato, AirPort, Centrale Bank y APHA.
Esunnan cu a acudi na e reunionnan cu parlamento a trece nan preocupacion padilanti. Ta anticipa cu e ley lo afecta e “loongebouw” di e entidadnan, esta tur salarionan di henter e compania. Ta anticipa pues un “trickledown” effect, door di cual esunnan cu tin menos salario tambe lo sinti e efecto den nan entrada mensual. Alabes a expresa preocupacion pa loke ta trata e personanan cu ta specialista den un of otro tereno cu no lo ta atrai mas pa bin traha na e companianan cu no lo por ofrece nan un salario atractivo. Tin di e specialistanan existente cu por haya trabou na un otro pais no lo keda mas. E ley aki lo por afecta alabes concurencia cu expertonan di exterior cu lo gana mas cu expertonan local. Esaki no ta husto. E falta di balor pa nos expertonan lo ocasiona un “braindrain”. Esta cu nos expertonan lo bandona nos pais pa bay traha den exterior cu e salario- y condicionnan di trabou mas atractivo. Tambe a menciona cu tin cu tene cuenta cu cierto entidad tin cu competi riba mercado y cu exterior y ta necesario pa nan tin experto cu por garantisa nan posicion competitivo.
Por a tuma nota alabes di e nota di cambio ariba e ley den cual ta amplia e entidadnan cu ta cay bou dominio di e ley den articulo 2 inciso 1, parti d. Aki ta agrega Fundacion Salud Mental Aruba Respaldo na e parti di Salubridad. E motibonan den e splicacion di e ley ta cu e fundacion ta haya entrada via di AZV y cu un di e miembronan di Raad van Toezicht di e fundacion ta tuma luga bou encargo di e ministerio di Salubridad.
Esaki mientras den articulo 4 di e ley ta indica cu e no ta aplica pa funcionarionan top manera dokter, dentista, boticario.
Aki por mira cu en bes cu e gobierno aki sostene salud mental en bista di diferente problema cu ta ser señala manera depresion, angustia y otro problemanan spycho-social y cantidad di e casonan ta mas halto y creciendo, por mira cu no tin suficiente atencion pa salud mental dor di e gobierno aki.
Ta lastima cu kier baha salarionan y limita entrada di e ciudadanonan cu ta yuda carga nos economia y di e forma aki baha e poder di compra mas ainda. Ta compara Aruba cu otro paisnan den region pero no por a compara Aruba nunca cu otro paisnan, mirando nos desaroyo. Semper nos economia tabata mas fuerte financieramente.
Di otro banda gobierno no ta baha su gastonan di goederen en diensten. Ainda tin nombracion continuo di friends and family, gastonan masha halto di abogado, huur di edificionanan di friends and family, auto caro cu e minister di financiën a lease y e fiestanan dje ministernan.
E minister presidente kier castiga nos pueblo pa por cumpli cu e palabracion cu el a haci cu Hulanda pa pasa e ley aki di Normering Topinkomens”.
