Lider di fraccion MEP, mr. Evelyn Wever-Croes, ta exigi aclaracion di Gobierno Hulandes tocante anotacionnan atribui na Reina Juliana y Reina Beatrix, publica den un buki reciente cu ta trata historia di Cas Real Hulandes. Segun Wever-Croes, e anotacionnan ta presenta Betico Croes den un forma sumamente negativo, describiendo como un lider autoritario y un persona cu tabata representa un problema pa Aruba. E lider di MEP ta considera e publicacion un herida profundo pa pueblo Rubiano, particularmente pa tur esnan cu tabata sostene e lucha pa Status Aparte.
Wever-Croes a confirma cu Parlamento a ricibi un mocion pa solicita Gobierno di Aruba busca aclaracion cerca Hulanda. Tambe t’e intencion pa manda un carta Tweede Kamer, solicitando cu Parlamento Hulandes trata e asunto. Wever-Croes a recorda varios incidente historico relaciona cu Betico Croes, incluyendo e tiramentonan na 1977 y 1983, e accidente di trafico na 1985 y e preguntanan cu ainda ta existi tocante su fayecimento. Sinembargo, el a enfatisa cu e no kier specula ni saca conclusion sin prueba. Segun e Parlamentario, ta responsabilidad di Hulanda pa explica e contexto di e anotacionnan y aclaria dicon a presenta Betico Croes den e forma aki.
Wever-Croes a anuncia cu dia 26 di november lo tin un marcha silencioso pa conmemora cuarenta aña di fayecimento di Betico Croes. E lider di MEP ta spera cu Hulanda finalmente lo duna e aclaracion cu Aruba merece.
