Fundacion Sonrisa a ricibi un donacion di Subway cu lo yuda e organisacion amplia su programanan pa inclusion laboral. E aporte lo contribui na e trabao di Trampolin pa Trabao, cu ta acompaña personanan cu limitacion pa nan por desaroya nan capacidad y haya un oportunidad den mercado laboral.
Fundraiser y relacionista publico di Fundacion Sonrisa, Isabella Trimon, a expresa su gradicimento na Subway pa e gesto y pa e apoyo na e trabao di inclusion. Segun Trimon, e donacion lo yuda Fundacion Sonrisa amplia su programanan y brinda mas oportunidad pa su clientenan.
El a splica cu e donacionnan cu Fundacion Sonrisa ricibi di comunidad ta bolbe directamente den diferente iniciativa di e organisacion, entre otro e programa di job coaching, One of a Kind Café y Inspiring Corner Kiosk. E inversionnan aki ta habri mas porta pa personanan cu limitacion participa activamente den comunidad y mercado laboral.
Trimon a destaca tambe cu e apoyo no tin cu limita na donacion financiero. Empresa- y miembronan di comunidad por contribui como boluntario, ofrece apoyo na un proyecto of colabora cu un programa specifico.
Trintiocho cliente activo den programa di trabao
Lider di ekipo di Trampolin pa Trabao, Joraine Lopez, a splica cu e centro ta brinda guia na adulto di 17 aña pa ariba cu tin un limitacion intelectual of fisico, cu e meta pa yuda nan drenta mercado laboral.
Actualmente, Trampolin pa Trabao tin 38 cliente activo cu ta participa den e trayecto laboral. Ademas, tin otro clientenan cu ya tin trabou y cu ainda ta ricibi guia di e coachnan di e programa na nan luga di trabou.
Lopez a haci un yamada na empresario y negoshinan pa habri nan porta pa inclusion laboral y duna personanan cu limitacion e oportunidad pa forma parti di nan ekipo. Segun Lopez, cooperacion cu sector priva ta fundamental pa por conecta e clientenan cu oportunidad laboral y yuda nan sinti cu nan tin balor y un luga den comunidad.
Con pa brinda apoyo
Personanan cu kier haya mas informacion of conoce con nan por contribui por tuma contacto Fundraiser Isabella Trimon via WhatsApp na 563-4513.
Pa informacion tocante Trampolin pa Trabao, interesado por bishita e centro na Pavia 13A, yama 582-9485 of busca e pagina di Facebook y otro red social bou di nomber Trampolin pa Trabao.
Fundacion Sonrisa ta invita empresario y negoshinan cu kier contribui na inclusion laboral pa tuma contacto cu e centro y explora posibilidad pa ofrece oportunidad di trabou na su clientenan.
