Ministerio Publico y Cuerpo Policial di Aruba ta haciendo investigacion tocante e funcionamento di varios aparato di analisis di rosea, e asina yama “aparato di supla”, cu ta uza durante controlnan policial riba maneha un vehiculo di motor bao influencia di alcohol.
E motibo di e investigacion ta hallazgonan relaciona cu e forma con e aparatonan aki ta calcula e resultadonan di e midimento y si esaki ta conforme cu reglanan legal vigente.
Ta realisando mas investigacion pa determina e naturalesa, e grandura y e posibel consecuencianan. Como medida di precaucion, temporalmente a saca e aparatonan di analisis di rosea en cuestion for di uzo.
E asunto aki a sali na cla durante un control interno. Investigacion adicional ta tumando luga. Den e investigacion di e aparatonan tin expertonan externo tambe envolvi.
Tanten cu e investigacion no keda cla, no por saca ningun conclusion definitivo tocante consecuencianan pa e resultadonan di midimento of pa casonan penal individual.
Ministerio Publico y Cuerpo Policial Aruba lo por brinda mas informacion na momento cu e resultadonan di e investigacion permiti.
A pesar cu a saca e aparatonan temporalmente for di uzo, control riba maneha bao influencia di alcohol lo continua sin interupcion. Cuerpo Policial Aruba ta sigui controla riba alcohol den trafico y lo haci uzo di otro posibilidadnan di investigacion cu ta disponibel na Polis pa por efectua e trabao aki.
Maneha bao influencia ta un peliger serio pa siguridad di trafico y ta sigui siendo castigabel pa ley.
