Parlamentario di fraccion di AVP, Dennerich Kelly, ta considera cu Hospital di Aruba mester haya solucionnan tanto pa corto como largo plaso pa enfrenta su problemanan financiero y e presion riba cuido medico. Kelly, cu tin experiencia den sector di cuido, a enfatisa cu e problema no ta algo reciente, sino un situacion cu ta existi pa basta aña.
Segun e Parlamentario, ta importante pa tene na cuenta cu Hospital di Aruba ta un institucion non-profit, cu mester dispone di suficiente recurso financiero, pero cu tambe mester evalua con ta inverti e placa.
Kelly a referi na declaracion di Edwin Jacobs di AZV tocante posibilidad pa asigna un suma di placa cu lo permiti hospital cubri algun costo pendiente y alivia e presion financiero. E medida aki por beneficia enfermeronan, dokternan y specialistanan, cu diariamente ta sinti e consecuencia di e situacion.
Sinembargo, Kelly ta enfatisa cu un solucion financiero inmediato no ta suficiente. Segun e parlamentario, Gobierno, directiva di hospital y otro stakeholdernan mester sigui traha hunto pa logra un solucion structural y duradero. E Parlamentario a indica cu gerencia di hospital ta sperando un intervencion di Minister encarga cu Salubridad Publico, drs. Mervin Wyatt-Ras. Kelly ta spera cu e dialogo actual lo resulta den decisionnan concreto cu ta garantisa stabilidad financiero y calidad di cuido medico na Aruba.
Pa mas, lesa TREMPAN.
