Ta parce cu, aunke Prome Minister y alabes Lider di MEP a cataloga cu e reunion den Conseho di Minister di Reino a bay den bon ambiente y cu tin trankilidad atrobe entre Aruba y Hulanda, un rato pasa e lider di Fraccion di MEP den Parlamento a los un atake frontal contra Gobierno Hulandes. No ta conoci si e ta haci esaki den nomber di e lider of riba su mes como dirigente di e 9 Parlamentarionan di MEP den Parlamento. Ta obvio cu MEP ta bayendo guera frontal cu Hulanda, na vispera di un Koninklijk Besluit (KB) contra Minister di Finansa Xiomara Maduro, pa falta di curashi y cumplimento cu e acuerdo cu e mes a cera cu Hulanda riba e forma cu lo maneha finansa publico.
Durante tratamento di “geschillenregeling” den Tweede Kamer, Secretario di Estado Raymond Knops a duna di conoce cu su departamento ta evalua si por interveni pa motibo cu Parlamento a cambia LAFT. E Secretario di Estado a duna di conoce cu e “geschillenregeling” mester wordo mira den contexto politico y enfatisa riba e importancia pa crea confiansa.
CONFIANSA y INTERVENCION
“Netamente pa crea confiansa nos a percura pa trece cambionan cardinal den e geschillenregeling manera presenta door di Knops. A percura pa introduci un areglo di evaluacion, no ta depende mas di permiso di Prome Minister di Hulanda pa inicia e proceso di atende cu un conflicto y a limita e motibonan pa cual lo por desvia di un decision cu ta wordo tuma ora tin un conflicto”, asina Rocco Tjon, Lider di Fraccion di MEP den Parlamento y alabes un di e autornan di e amienda contra CAft y Conseho di Minister di Reino Hulandes a skirbi den su relato di prensa awe.
E cambio di mas grandi ta cu awor lo introduci un organo nobo cu lo analisa y duna un veredicto na momento cu tin un conflicto entre dos pais. E amienda di Ady Thijsen a percura pa e “afdeling koninkrijksgeschillen” bira un realidad.
SUPERVISION FINANCIERO
Ta remarcabel cu e Secretario di Estado ta indica cu mester crea confiansa pero den mesun rosea ta menasa cu Hulanda ta explorando maneranan pa interveni. Mi ta kere cu nos tur por ta di acuerdo cu comentarionan asina no ta crea confiansa y comprension.
Comentarionan cu no lo tin supervision financiero mas no ta cuadra pasobra atraves di articulo 43 inciso 2 di “Statuut” Gobierno di Reino semper tin autoridad pa interveni si en berdad nan ta di opinion cu ta neglisha finanzas publico. Otro ponencia di e Secretario di Estado ta cu e cambionan haci den LAft por perhudica circumstancianan faborabel pa Aruba por finansia su debe. Pero na mes momento e Secretario di Estado no ta haci esfuerso pa mehora e circumstancianan aworaki atraves di un “zachte lening”.
CAMBIONAN DI LAft
“Mescos cu Hulanda ta explorando nan posibilidad pa interveni a base di e cambionan haci den LAft, nos tambe ta explorando tur posibilidad pa apela na instancianan internacional, si Hulanda en berdad dicidi di interveni”, asina Rocco Tjon ta adverti Gobierno Hulandes.
E hoben politico, cu a participa na eleccion pa prome biaha na september 2017 ta insisti cu pa Hulanda interveni pa motibo cu representantenan di pueblo a tuma un decision a base di ley, ta preocupante. “Nos representantenan di pueblo a wordo eligi a base di eleccionnan liber. Manera conseho di Estado Hulandes mes ta señala, e ta e escencia di democracia cu su representantenan di pueblo por efectua cambionan den leynan. Sumamente preocupante si Hulanda tin pensa di interveni pa e motibo aki y nos no lo acepta esaki”, asina e ex Polis, Rocco Tjon a enfatisa.
