Hopi ta bisti e armband cu e palabranan “TinoRuiz”. Lider di fraccion di MEP, Rocco Tjon a bisa cu e nunca ta kita e “armband”, pasobra e ta brinda homenahe na Tino Ruiz (d.f.m.). Na 2018, el a entrega un mocion den Parlamento, sosteni unanimamente, pa yega na un estatua di reconocimento pa Tino Ruiz. Un polis cu a paga e prijs maximo pa salvaguardia siguridad di nos tur.
Riba 15 di mei venidero nos ta observa agentenan policial cu diariamente ta riesga nan bida pa percura pa siguridad di comunidad. Esaki ta un iniciativa di Presidente Kennedy, cu a proclama na 1962, e fecha 15 di mei como “Peace Officers Memorial Day” y e siman cu e dia special aki ta cay aden, como “Police Week”.
Mundialmente ta para keto na e siman aki, incluyendo Aruba. Ta importante pa refleciona riba e sacrificio y responsabilidad cu polisnan ta tuma riba nan mes. Nan ta opta pa proteha nos pais y ta pone nan mes den posicion vulnerabel. Apesar di esaki tur dia nan ta lanta y bisti nan uniform pa sirbi nos pais.
“Orguyosamente mi a forma parti di e famia di Cuerpo Policial y mi sa cu e trabou di e agentenan policial no ta facil, pero uno hopi respeta y Tino Ruiz (d.f.m.) a bira un simbolo pa Cuerpo Policial. Pesey e mocion pa traha un herdenkingsmonument den un parke recreacional pa esunnan cu ta traha den husticia, mester bira realidad e aña aki”, segun Parlamentario Tjon.
“Mi kier garantisa tur Polis y e famia di Tino Ruiz (d.f.m.) cu no a lubida su esfuersonan y e mocion cu a entrega na aña 2018 lo bira realidad e aña aki, mirando cu e recursonan necesario ta disponibel”.
