E ta un tradicion cu a cuminsa na aña 1997 door di defunto Harry Croes y defunto Rudy Croes. E deseo di Harry semper tabata pa hisa e bandera di mas grandi di Aruba, por lo menos esey su yiu muhe, Jessica Croes a conta Brian Koolman di 24ora.com durante e ceremonia di hisamento di bandera na sede di MEP.
E tradicion di e partido geel, funda na aña 1971, semper tabata pa mey anochi manece 18 di maart, hisa e bandera di Aruba. Pa nan, t’esun di mas grandi di Aruba.
Lider di MEP alabes Prome Minsiter di Pais Aruba, mr. Evelyn Wever-Croes a conta Brian Koolman di 24ora.com cu, desde aña 1997 te cu awe, nunca a keda sin hisa e bandera mey anochi. Na aña 2020 a his’e 7:00 pm debi na Toque de Queda.
E aña aki ta special y historico, e lider a conta, mirando cu e presidente nobo di partido, Ricky Hoek, a percura p’un bandera nobo. Pues, aña pasa tabata e ultimo biaha cu a hisa e bandera cu a inicia cu ne na aña 1997.
“Awe no tin politica”, Ricky Hoek a comenta durante un entrevista na nan sede. Como presidente nobo ta importante p’e sigui cu e tradicion di e grandinan. E bandera, pa MEP, ta simbolo di nan fundeshi y nan lucha pa Aruba ta para riba su mesun pianan.
E mandatario di cultura, mr. Xiomara Maduro tambe a combersa cu e media mas grandi di Aruba, 24ora.com. El a gradici pa e presencia pero tambe a desea e pueblo un feliz Dia di Himno y Bandera. E ta stimula tur pa sali y gosa di e dia.
