Tin mas otro empresa cu tin trahadonan cu kier termina nan confiansa cu un sindicato, bay na un otro. Segun mediador di gobierno, Anselmo Pontinlius, a menciona, FTA a manda dos peticion di referendum. A drenta pa AAA NV y a drenta esun di Alhambra Casino.
Esun di Alhambra Casino, ta un grupo grandi cu ta afilia na STA y FTA ta esun cu a pidi e referendum awor aki y esey tambe a cuminsa cu su proceso. Mediador tin’e awor aki y esey tin cu procesa, publica mescos cu esun di aeropuerto. Ta un proceso caminda cu e trahadonan a scoge e caminda ey. E peticion di e referendum no ta bisa tur cos ainda, pasobra ta na e momento cu vota, eynan ta determina si e actual sindicato of esnan cu a pidi e referendum, ta haya e mayoria si of no.
Cu e resultado di e referendum na mesa, e sindicato (nan) ta bay cu e dunado di trabao pa negosha un contracto colectivo.
E balor
Awor un grupo grandi di trahado di Alhambra ta afilia na STA. Awor aki nan a scoge pa bay bek na FTA pa FTA representa nan. Pa FTA representa nan, e referendum tin cu tuma luga y si nan haya e mayoria, e lo ta den e proceso pa bay atende cu nan.
Na momento cu un sindicato pidi un referendum, e mediador tin cu haya dentro di 14 dia, prueba cu e cantidad di hendenan cu ta miembro. No ta solamente manda bisa cu un carta cu tin un mayoria. Tin cu haya un lista cu nomber, formularionan yena etc. Na e mesun momento tin cu haya un lista di dunado di trabao pa compara y comproba cu loke e sindicato bisa, ta corecto.
Reconocimento
Solamente Mediador di Gobierno lo acerca e dunador di trabao si e ta reconoce mesora, si no tin otro sindicato of no tin señal di otro sindicato.
Na momento cu tin mas cu un sindicato cu ta den contienda pa representa, of ta duna indicacion cu nan ta representa trahadonan, Mediador di Gobierno ta cana e caminda di referendum. Ta palabra y papia cu tur partido envolvi of papia cu nan na mesa, pa sa cu ta bay tin un referendum y nan tin e libertad pa participa e ora.
Tanten cu nan cumpli cu loke ley di referendum ta bisa. Den caso cu si no tin ningun sindicato, ta papia cu e dunado di trabao y ofrece e partidonan pa firma un protocol, un acuerdo di reconocimento.
