Bruce Ponson ta hopi disgusta cu e gañamento cu tin riba e estado di e edificio den Frankrijkstraat cu Gobierno tabata huur pa algun departamento di Cuerpo Policial di Aruba. E ta sinti cu tin gañamento pa sali di e edificio y cera un contract nobo na un otro sitio.
Manera ta conoci, tin un preocupacion pa loke ta e edificio den Frankrijkstraat, caminda cu tin varios Departamento di Polis tabata ubica. Di repente a cuminsa circula poco rumor cu Ponson ta haya cu hasta tin un tinte politico cu nan. Segun Bruce Ponson, managing director di Britania Development Company cu ta encarga e edificio, tin seis departamento di polis eynan y nunca tabata tin problema asina aki. A bin resulta awo cu ta papia di cosnan cu e mes no tabata sa di nan y cu a sali den prensa. Y tur ta informacionnan cu no ta cuadra.
Ta papia di e edificio ta malo of den mal estado. Pa Ponson, e rumornan aki ta simplemente un strategia, pasobra e Polisnan tabata sa caba cu ta bay muda for di e sitio, pasobra Minister a busca otro luga pa nan. Inclusive, nan tin un luga caba awo y p’esey e ta bisa cu tur loke a wordo bisa, tabata simplemente un excuus.
Asina Ponson a splica cu aworaki ta drechando cos na e edificio, cu tabata fout di e huurdo mes y cu ta nan mester a drecha. Por ehempel, tin trahadonan baña y a laga e wc keda core te cu el a pasa over. “E awa a keda core paden, pero ta awa limpi. E pos a yena, pero e awa dushi di e wc a bin paden y no e awa sushi. Esey ta e prome cos fout cu a menciona,” segun Ponson.
El a laga e compania Total Cleaning haci e limpiesa y nan a inform’e cu e cadena a lora full rond di floater, cu a consecuencia di esey no ta baha ora cu flush. Door di esey e awa a sigui core. E wc a keda yena te cu el a yena full e luga. Ponson a bisa cu no por kere cu e mester ta para den e luga p’asina wak ki ora un hende bay baño cu e floater no ta keda pega. “Nan mester tin un departamento cu mester bin check e cosnan aki regularmente. Ningun hende a cera e kranchi tampoco, pa asina evita cu e awa lo a overflow.”
Kibramento di contract
Bruce Ponson a haya tende for di DIP cu for di luna di maart e mester a haya un carta, pero cu no a yega su destino, caminda cu nan ta infiorme cu e Polisnan ta bay sali for di e luga un aña prome cu e contract a vence. Ponson a haya e carta aki apenas un luna pasa, informando cu nan ta sali di e edificio.
Den e contract tin un clausula cu ta permiti nan kibra e contract. A negocia e contracto pa tres aña y hasta a baha prijs pa nan, y tres biaha. Ponson a menciona cu e no ta worry cu a kibr’e y e sa kico ta e motibo. Pero si loke e no kier, ta papia malo di e edificio. Tin mas hende ta haya pan di e contractnan aki. E minister a gaña y ora el a rectifica, el a bisa cu ta Ponson mester percura pa e no pasa mas. “Si e hendenan no ta percura pa e bañonan, ami no por haci nada.”
Drechamento
“Mi ta yuda ora cu por. Antes KPA tabata tin un ploeg cu ta bin haci e cosnan aki, entre otro check e bañonan, y drecha nan. Aparentemente nan no tin e ploeg aki mas. E persona cu ta deal cun’e di KPA, ta esun cu ta yama indica cu algun cos no ta bon,” Ponson a splica.
Tin biaha, el a bisa, e mes ta yuda nan pasobra nan ta yam’e direct. “Di mal servicio nunca no tabata tin y no ta trabao di e compania. Ta huur e luga, pero KPA tabata tin e reparacion diario. Hasta contract tabata tin pa service e airconan cada dos pa tres luna. Tambe tin Total Cleaning cu a bin varios biaha y a declara cu no tin schimmel. Pero si tin hopi vocht, pasobra e hendenan ta laga bentana y porta habri. E friu di e airco y calor ta condensa. Cu esey no por haci nada tampoco. No por stopnan pa huma sigaria pafo. Nan ta laga e bentanan habri,” cual Ponson a bisa e no por haci nada contra esaki.
Huurmento edicificio nobo
Ponson a splica cu unico cos cu e kier, pa nan stop di gaña y papia berdad di e edificio. Ta trata aki di un bon edificio. No bay papia cu e edificio ta malo y e doño no ta percura pa e edificio y su clientenan. Si ta keda gaña, e ora Ponson ta sali p’adilanti. Tabata tin varios rapport traha cu a pasa den e luga, pero parce cu nanno ta lesa nan. Ponson a yega di papia cu Minister Otmar Oduber un biaha y a puntr’e si el a lesa e rapport, pero e mes a bisa cu e lesa esakinan. Tur hende a haya e rapportnan, segun Ponson. Ministernan Bikker, Oduber, DIP y KPA tin e rapportnan.
Ponson a bisa cu el a huur e luga aki pa hopi aña y nunca e tabata tin problema, manera cu e tin awo. No tin un motibo cu nan mester sali di e edificio. Ponson a bisa cu e no sa si ta trata aki di politica. Pero loke si e sa, cu e edificio ta bon. A trata e cliente bon y e polisnan por verifica esey. Esnan cu ta tras di e minister, por ta no ta bay contesta esey, pero mayoria di nan si. Loke cu Ponson kier sa pa loke ta e prijs, si DIP a bringa e prijs mesun hopi cu a bringa cu Ponson. E compania tabata dispuesto pa yuda gobierno y a baha esaki dos biaha. “Ban wak ta cuanto e prijs lo ta pa meter cuadra awo,” el a bisa.