Un grupo di mas o menos 230 mayor a dicidi pa skirbi un carta di protesta na Minister di Enseñansa, Endy Croes, relaciona cu e situacion reinando na Scol Primario Kudawecha. Den nan carta di dia 14 di september 2023, e mayornan ta describi un situacion cu ta parce no tin solucion pa e alumnonan specificamente di klas 5 y 6. Ambos klas tin mas o menos dos aña sin por duna e alumnonan les di idioma Spaño ni Ingles, pa falta di docente capacita pa duna e lesnan aki.
Mayornan ta lamenta cu, door di maneho di Directie Publieke Scholen (DPS) y di Minister di Enseñansa, Endy Croes, cu awor nan yiunan a cay atras, den forma structura, den lesnan di ambos idioma. Ta sinti cu e muchanan aki lo keda atras den nan educacion pasobra ta con lo por “haal in” e atraso aki den lesnan cu nan no a haya e ultimo dos añanan aki. Y riba dje, DPS parce di no tin un solucion tampoco pa e situacion y como tal ta laba man y laga e scol desampara atras den nan problema.
Cu e realidad aki riba mesa, mayornan cu tin yiunan atendiendo Scol Primario Kudawecha ta sinti cu e maneho ta iresponsabel! Ta urgi pa Minister di Enseñansa y tambe Parlamento di Aruba cay den e asunto aki y busca un solucion structural pa e scol. No por ta asina cu aki rato, ora cu e muchanan mester sigui studia pa MAVO, HAVO, VWO of pa EPI, cu nan lo no por domina e dos idiomanan aki of cu ta keda sin acepta nan na scol pa falta di e dos vaknan aki den nan pakete.
A funda Scol Primario Kudawecha dia 1 di januari 2008 y a yam’e na e mesun nomber di e bario unda e ta situa. E scol ta situa na Kudawecha 150, na Noord. Scol Primario Kudawecha ta resorta bou di Directie Publieke Scholen (DPS) y ta conta cu mas o menos 330 alumno. E ta un di e scolnan ehempel aplicando e maneho di “Scol Saludabel” den cual ta promove pa alumnonan come saludabel y participa activamente den deporte, como parti di nan desaroyo.
