Tabata na augustus ultimo cu Parlamentaria drs. Shailiny Tromp-Lee di e Fraccion di MEP den Parlamento di Aruba a manda un total di 17 pregunta na Prome Minister mr. Evelyn Wever-Croes, cu alabes ta Minister di Infrastructura di nos pais. E parlamentaria, cu ta procedente di e districto di Noord, ta preocupa pa e proyecto di embeyecimento dilanti hotelnan High Rise. Despues di un luna di tempo, el a haya contesta riba tur e preguntanan cu e tabatin relaciona cu e trabounan pendiente.
E echo cu Dienst Openbare Werken (DOW), cu ta resorta bou di Minister di Infrastructura, cu ainda no tin fin di drecha e caminda dilanti e hotelnan grandi, tin atencion di Gabinete Wever-Croes II tambe. E prome mandatario a contesta e parlamentaria cu mirando cu nos a drenta den e temporada di horcan unda por spera hopi yobida, a dicidi di pospone inicio di e trabaonan aki di drechamento di e caminda dilanti hotelnan pa otro aña 2024, specificamente despues di carnaval. E proyecto completo lo tin un duracion di 75 dia di trabao.
DOW a splica Gobierno, cu na nan turno a splica e parlamentaria cu esaki tabata pa motibo cu durante e construccion di e rotonde di Palm Beach, DOW a hay’e confronta cu hopi yobida y a experiencia cu e awa den subsuelo (grondwater) a subi, cu a afecta e trabaonan den un forma negativo. Pues a sufri retraso. Pa evita molester den e area di high rise cu caminda bao construccion y cu hopi yobida den temporada halto, a opta pa inicia e trabao te otro aña.
E dos retonan cu e proyecto aki tin, ta na prome luga pa mantene e accesibilidad na e hotelnan durante construccion y di dos maneha e riesgonan di construccion. Awor ta den e proceso di destaho publico, cu ta planea pa tuma luga den luna di october. Pa cada fase lo tene un destaho publico separa.
A opta pa parti e proyecto di embeyecimento dilanti hotelnan High Rise den tres fase. E prome ta encera 600 meter di caminda, riolering y drenahe. Pues, for di Riu Antilla te na South Beach. Di dos fase ta mescos cu esun prome, entre South Beach y Holiday Inn Hotel. E ultimo fase ta un caminda pa peaton y bicicleta y acera. Lo traha un parkeerplaats tambe dilanti Riu Resort.
Cuanto e proyecto aki lo costa den su totalidad no ta conoci ainda pa DOW, pasobra mester organisa e destaho publico prime. Djey lo tin un miho idea di cuanto e lo costa completo. Gobierno a bisa acerca si cu nan ta den combersacion cu AHATA y ATA pa mira kico nan aporte lo por ta. Prome indicacion ta cu AHATA ta interesa pa financia e landscaping.
Anticipando riba e proyecto, DOW a enfatisa cu berdad, un di e retonan lo ta, con pa duna acceso na e hotelnan durante e temporada di construccion. Durante e ehecucion di e trabaonan lo tin diferente cambio di ruta segun e proceso ta adelanta pa keda duna accesibilidad na hotelnan.