Tabata dia 14 di september ultimo cu miembro di Parlamento di Aruba, pa fraccion di MEP, esta Marco Berlis, a lansa cinco pregunta na Minister Ursell Arends, relaciona cu e desaroyonan rond di e proyecto pa traha un beach dilanti Embassy Suites by Hilton Aruba Resort.
Ta algun luna caba cu partidonan a bay Corte buscando un possible solucion pa e impasse. Sinembargo, ta mas cu bisto awo cu e decision a para bira un bataya politico entre ministernan di Partido MEP vs esun di Partido Raiz. No por kita for di e percepcion cu tin un midimento di forsa entre e mandatarionan, cu de facto, ta laga e inversionista Spaño como e gran victima y e proyecto bou un presion enorme debi cu no por ofrece e huespednan servicio di beach.
Parlamentario Marco Berlis den su carta ta puntra Minister Ursell Arends cu tin basta preocupacion cu e asunto di ontheffing cu Embassy Suites mester pa sigui traha riba un beach propio. Parlamento kier sa, mirando cu gobierno a duna aprobacion basta tempo pasa caba na Embassy Suites pa un beach propio, si minister por duna Parlamento un update di ki solucion el a busca pa e “yerbe protegi” cu ta crece n’e beach unda Embassy Suites kier amplia y traha un beach mas grandi.
Minister Ursell Arends, den un entrevista riba e beach, lo a anuncia cu lo tin un conseho y decision rapido riba e ontheffing cu lo mester pa e beach aki por bira un realidad. Pero, awo ta confronta un tardansa enorme di lunanan caba y pesey e parlamentario kier pa e minister splica, cu mirando cu e inversion haci ta uno miyonario y cu wowonan di inversionistanan ya caba ta monitor e situacion di Secrets na San Nicolaas y awor tambe di Embassy Suites na High Rise, cu pa ki tempo minister ta premira cu lo bin cu un solucion?
Berlis kier pa Arends contest’e por escrito si por realoca e “yerbe protegi” cu ta crece dilanti Embassy Suites pa un otro caminda den nos naturalesa cu tambe ta protegi, pa asina e por crece sin interupcion.
Y finalmente Berlis ta puntra Minister Arends, mirando cu e proyecto aki a provee hopi cupo di trabao y lo contribui grandemente na nos economia, cu e ta haya cu un solucion duradero y rapido ta na su luga. “Nos mester sigura e futuro di nos naturalesa pero tambe cumpli cu e compromisonan cu nos economia y finansas, cu aworaki apenas ta recuperando. Cua ta minister su vision pa pone e dosnan aki den un balans perfecto mirando e situacion actual di nos pais?”
Tocante Embassy by Hilton
Embassy by Hilton, ta un di e 18 marcanan lider den e mercado di Hilton, cu ta dedica na ofrece loke ta mas importante pa e biahero. Servicio completo, accesibel y exclusivo ta loke e marca ta ofrece na biahero di placer y pa negoshi. Embassy Suites by Hilton ta number un den su clase, cu ta ofrece two-room suites, free made-to-order breakfast, open atrium, 24-hour fitness centers y complimentary evening reception. Embassy Suites by Hilton tin mas di 260 hotel y 42 propiedad den desaroyo.
Tocante Embassy Suites by Hilton Aruba Resort
E compleho di construccion nobo di 8 piso y 300+ suites na Aruba, ta conta cu suitenan espacioso y exclusivo di Embassy Suites by Hilton, ekipa cu un sala apart, un camber priva y un minibar cu microwave, minifridge y koffiepot. E compleho ta brinda un espacio flexibel pa reunion di 6 mil pia cuadra, un spa di mas di 3000 pia cuadra, piscina den aire liber, un gym y casino, cu lo habri dentro di algun tempo mas. E hotel nobo ta ofrece un restaurant exclusivo, un bar y opcion di un grab-and-go dining pa un snack lihe. Huespednan tambe ta disfruta di servicionan exclusivo, cu ta inclui desayuno di cortesia prepara na bo gusto y recepcion anochi cu snacks y bebida.
Contrario na tur otro Embassy Suites na mundo, den caso di Aruba, a debuta un hotel na nivel “upscale”, conoci como e “all-suite” Embassy Suites by Hilton na Aruba. Doño di e edificio ta Natura Development NV, cu a cera un acuerdo di operacion cu Hilton. E edificio di 300+ suite oceanfront Embassy Suites by Hilton Aruba Resort, ta marca e di dos hotel di Hilton riba nos isla y ta reenforsa e plannan continuo di expansion di e compania den Caribe.
Ta for di aña 2016 caba a start cu preparacionnan y desde 2018 e trabounan di construccion a cuminsa, planea pa a keda cla na 2021. Pero debi na pandemia y e medidanan di distanciamento social, a stroba e proyecto y a tuma por lo menos dos aña mas pa por a keda cla.
