Ora mayor ta haci bon, bon ta bin pa su mes y pa su yiunan. Dios ta fiel y Dios conoce e preocupacion cu cada mayor tin pa nan yiunan.
E enemigo sa con cansa mente di un mayor y ta p’esey Dios tin promesa grandi pa mayor y ora nos como mayor kere den Dios, e promesa ta bira realidad den nos bida y nos famia.
Den Isaias 54:13, Señor ta bisa: “Señor lo siña bo yiu hombernan y e prosperidad di bo yiu hombernan lo ta grandi.”
Isaias 26:3-4Señor ta bisa: “Lo bo warda den paz perfecto esun cu su pensamento ta permanece den Bo, pasobra e ta confia den Bo. Confia den Señor pa semper, pasobra den Dios e Señor, nos tin un baranca eterno.
Ora circunstancia ta mustra bo algo diferente fo’i palabra di Dios, bo tin di bay bek n’e promesa di Dios y afirma bo Fe den dje, pasobra Dios su promesa ta eterno.
Ora bo yiunan ta den mal amistad of tin relacion cu hende cu no ta cana den bon caminda y bo sa esey, bo mester recorda Señor riba su promesa den Isaias 49:25 cu ta bisa: “Hasta e catibonan di e homber poderoso, lo ta kita fo’i dje y e prooi di un tirano lo ta rescata. Pasobra lo Mi pleita cu esun cu ta pleita cu bo y lo mi salba bo yiu hombernan.”
Pasobra Señor tin e poder pa saca bo yiu fo’i gang di bandido y libra bo yiu fo’i man di hende cu ta den mundo di scuridad, den asunto di droga y arma.
Den e buki Genesis 26-5 Dios ta bisa Isaac cu Dios ta bendiciona Isaac pasobra su tata Abraham a obedece Dios. Esey ta para skirbi pa tur hende por mira cu ora nos como mayor haci bon, bondad lo bin pa nos yiunan.
Dios a mustra misericordia na Salomon, door di a hacie rey, cumpliendo asina cu e promesa cu Dios a haci na su tata David. David tabata stima Dios.
Como mayor aunke cuanto placa bo tin na banco y cuanto propiedad bo tin, toch bo tin e preocupacion con lo para cu bo yiunan. Pasobra tur mayor sa cu nada material no por yuda ora nan yiunan ta den mal caminda of malesa por ataca nan. P’esey Dios ta demanda di tur mayor pa lanta nan yiunan den caminda di Señor.
Proverbionan 22-6 ta bisa: “Instrui e mucha den e caminda cu e mester cana y hasta ora e bira bieu e no lo aparta su mes for di dje.”
P’esey como mayor bo tin di busca Dios y pone Dios na prome luga den bo bida y den bo hogar y den bida di bo yiunan p’asina proclama lo siguiente:
Isaias 54-17: “Ningun arma forma contra bo lo no prospera y tur lenga cu lanta contra bo den husgamento lo bo condena. Esaki t’e herencia di e sirbidonan di Señor y nan hustificacion ta bin fo’i Mi,” Señor ta declara.
Nos mester ta sirbido di Señor pa nos por proclama bendicion riba bida di nos yiunan, pa nos por intercede pa nos yiunan dilanti di Dios.
Mas bon nos haci como mayor, mas bendicion lo bin riba nos mes bida y riba bida di nos yiunan.
Pastoor Marcel Balootje
