Diadomingo mainta pa mas of menos 10:30 am a sosode un otro accidente na e crusada di Palm Beach, caminda cu dunamento di preferencia atrobe ta e causante. Ta trata aki di un Kia Rio hatchback A-66093 colo shinishi y un Mitsubishi Outlander colo preto numera A-52758. Ambos chauffeur a resulta herida. E chauffeur masculino di e Kia ta sinti sla na cabes mientras e chauffeur femenino di e Mitsubishi a sinti sla y dolor na pecho. Fuera di esey e Kia a ranca borchi di trafico, cual a keda pega bou dje auto.
Unidad di polis di trafico a presenta como tambe e ekipo di rescate di brandweer debi cu e porta di e Kia no kier habri, pues mester corta esaki pa asina por saca e chauffeur. Unidad di polis a informa e chauffeur aki tambe pa mantene su cabes stret y pa no haci ningun movecion abrupto mientras ta warda pa nan pone e ‘neck brace’ p’e.
Tur cos ta mustra cu e Kia tabata bayendo direccion Malmok riba caminda di preferencia y e Mitsubishi probablemente no lo a mir’e na tempo, cu consecuencia cu el a bay dal den banda robes di e Kia. Ta bon pa tuma nota cu ta apenas algun dia pasa tabatin otro accidente cu turista herida, cu tambe ekipo di rescate mester a presenta. Ainda e crusada aki ta un bista mahos den e curazon di nos turismo, sin conta cu e ta presenta un peliger diario pa trafico riba nos isla.
