Tabata alrededor di 11:50 pm cu polis a presenta un poco mas pabou di Anytime Bar na Paradera p’un chauffeur betra. Na yegada a bin topa cu un meneer di edad tras di stuur y un pasahero sinta patras. Durante e prome secondenan di interogacion, ya e agente a saca afo cu e chauffeur ta bou influencia.
Pa siguransa, a haci un test di alcohol cu ne, di cual; no a sali na su fabor. A purba por lo menos tres biaha, e prome dosnan el a baba e pipa mas cu el a supla. A deten’e y transport’e pa warda di polis caminda lo present’e dilanti un subfiscal.
Otro automobilistanan a duna di conoce cu, na mas cu un ocasion e chauffeur burachi a baha caminda y casi accidenta contra otro auto.
Na prome instante a kere cu e pasahero ta ilegal riba nos isla, pero despues el a saca su prueba di permiso. E auto a keda para bandi’i caminda mientras e chauffeur deteni y a pasahero a haya un lift gratis pa Noord cu polis, caminda e ta biba.
