Un Rubiano cu te dia di awe ta stima arte culinario y ta brinda cada bishitantenan e miho cu nos isla tin di ofrece. Eduardo Johannes Ellis, naci dia 13 di april 1941, na un edad basta hoben a bay den exterior pa finalisa su estudio, cu e tempo ey no tabata posibel na Aruba mes. El a studia na Den Haag den e ramo di Horeca, cu tabata su gran pasion.
Despues di finalisa su carera, namora y forma su famia, a bolbe su isla natal pa cuminsa gana experiencia den e mundo hotelero y gastronomico. Un carera exitoso na diferente parti di mundo a forma e base pa asina e por a bira parti di e grupo visionario elite di baluarte den turismo riba nos isla.
Algun di hotel cu Eduardo Ellis a fungi den funcion ehecutivo tabata, entre otro, Holiday Inn Corsou na 1967, no mucho tempo despues a haya posicion na e main office na Memphis, Chicago y Milwaukee den e mesun cadena di hopi Holiday Inn pero na Merca. Ademas di e experiencia, a cumpra y maneha un hotel low rise di 42 camber na Hulanda caminda a amplia aun mas su conocemento den servicio y e arte culinario.
Aruba semper hopi cerca di su curason y ta pa e motibo aki a tuma e decision di kier aporta na su isla natal. A mira con Aruba a cuminsa tuma e pasonan pa desaroya den e area turistico pa asina crea e pilar economico cu awe nos tur conoce. A mira cu e meta aki tabata esencial pa Aruba y kier a duna su aporte na e industria creciente di Turismo. Asina ey, el a ofrece su experticio na Sun Development Group cu acepta.
Na aña 1982, Ellis a muda su famia permanentemente pa Aruba caminda despues di un aña a join un otro icono di turismo, esta Ike Cohen cu e tempo ey tabata manager di Talk of the Town.
