Marlon Sneek: Aruba tin un gobierno ‘Stamboom’

No ta algo nobo pa un gobierno di MEP ya cu den pasado caba esaki a sosode ora cu practicamente henter famia di e Prome Minister di e tempo ey, Nel Oduber, a haya trabou den gobierno.

Gabinete Wever Croes no a laga e tradicion aki cay y fuera cu partido MEP ta conoci hopi bon pa su maneho na interes di ‘friends & family’, e tradicion di hinca famia den aparato di gobierno a continua caminda ruman, casa, tanta, omo, primo- y primanan, acto primo y hasta hendenan yega na e famianan aki, ta haya trabou den un gobierno di MEP.

Lider di fraccion di AVP, Marlon Sneek ta mustra cu apesar cu prome minister Evelyne Wever a mustra cu tur cos lo cambia y cu su gobierno lo traha pa pueblo, lo pone e ser humano central, e unico hendenan cu ta central den su gobierno, ta su famia- y amigonan.

“Den algun luna di tempo gabinete Wever Croes a aumenta gasto di personal cu 10 miyon pa cual hecho tanto Raad van Advies como CAFT a adverti e prome minister riba e desaroyo aki.

Hasta a dicidi di pone un condicion cu gabinete Wever Croes lo tin cu reduci gasto di personal cu 12 miyon loke ainda no a sosode y tur e tempo aki ta sigui haya informacion di hendenan cu ta wordo nombra den diferente departamento di gobierno.

Den edificio di Cocolishi e trafico di famia y amigonan ta asina grandi cu lo ta na su luga pa pone luz di trafico pa dirigi e drukte cu tin eyden di tanto hende cu ta cana dal den otro.

Gabinete Oduber den pasado a duna trabou na practicamente tur generacion di e famia aki y ta mas cu claro cu e actual prome minister kier kibra  e record aki caminda practicamente a converti gobernacion den un asunto di famia y amigonan.

Mientras cu pueblo a wordo gaña pa partido MEP cu no a cumpli cu promesanan haci durante di campaña, ya ta conoci den pueblo cu medida y inflacion ta e regalonan cu pueblo a haya for di gabinete Wever Croes mientras cu trabou cu bon salario a bay pa famia- y amigonan y pa no kibra ley, ta sponsor- y sostenedonan di e partidonan den gobierno, ta wordo beneficia prome cu pueblo.

A priminti pueblo solucion sin medida pero a aumenta BBO y a ranca placa na unda cu tabata por. A priminti gasolin barata pero prome cos cu  haci ta di ehecuta aumento di accijns riba gasolin.

A priminti reduccion di prijs di awa y coriente pero gabinete Wever Croes a drenta den e companianan aki pa exigi pago di dividendo di e companianan estatal, cual placa lo por a wordo usa pa baha e prijs di awa y coriente un tiki pa duna pueblo un alivio.

E promesa di aumenta salario minimo tampoco a cristalisa, un promesa haci durante di campaña cu prome minister mes a bari for di mesa asina cu el a wordo huramenta como lider di e gobierno mescos cu su promesa di reduci cantidad di minister pa scapa 50 miyon pero mester a doblega pa presion di un partido chikito y a keda cu 8 minister y un secraterio di estado cu tambe tin salario di un minister.

Pa pueblo no tin nada ainda y lo no tin nada mas cu un lucha su dilanti contra di inflacion y un economia den recesion crea pa un falta di vision y capacidad pa goberna.

Sinembargo ora cu realisa cuanto famia y amigo a haya trabou, caminda a retira diferente director di departamentonan pa nombra nan hendenan, nos por conclui den un forma concreto cu  Gabinete Wever Croes ta birando e prome gobierno “stamboom” den historia politico di nos pais ya cu tur tipo di famia ta den servicio di gobierno y tur yega na e famianan aki, tambe ta wordo bon atendi y ta busca algo pa nan haci y ta mas cu claro cu na final di dia, pueblo NO tin algo di haya di e gobierno aki,” lider di fraccion Marlon Sneek ta mustra.

Comments

comments