Recientemente den un programa di NoticiaCla Live cu Tito Lacle e futuro minister Ursell Arends a bisa cu un di e prome cosnan cu e lo haci asina cu e haya e funcion oficialmente, e lo invita parlamentario Marisol Lopez-Tromp pa un reunion. Ey e kier pa e parlamentario cont’e, cu prueba, riba e alegacionnan cu e ta haci di cu lo tin spirito ta cana rond den Cocolishi. Arends kier haya sa si ta den serio Lopez-Tromp tin prueba pa bisa locual e ta bisando of si ta djis bisa cos sin base. Gobierno nobo tin hopi reto asina grandi, cu no tin tempo pa perde awo cu e tipo di discusionnan asina.
E ex-minister no a keda keto y a contesta e hoben politico mesora ayera merdia den e programa di noticia “Enfoke”. Tabatin basta expectativa pa e programa di ayera, debi cu a anuncia cu parlamentario Marisol Lopez-Tromp lo t’ey pa contesta Ursell Arends riba su declaracion relaciona cu spiritonan. No ta un asunto di awo, sino tabata desde cu Marisol Lopez-Tromp a asumi e funcion di Minister di Infrastructura, desaroyo teritorial y medio ambiente, cu mesora el a cuminsa tuma accion. A constata cu riba su payroll na su ministerio, e tabatin trahado cu nunca el a mira. E no sa mes ken nan ta, no sa kico nan ta haci, pero mester paga nan tur luna si. El a cataloga nan como coordinadornan spirito. E nomber a bira masha popular, tipificando e tipo di trahadonan cu ta cobra pero sin traha.
E fenomeno aki no ta existi bou partido POR so, pero den MEP tambe tabatin tipo di coordinado riba payroll y no tabata presente niun dia. A repasa varios caso di coordinador, di cual algun tin trabou den sector priva y asina mes ta cobra salario na gobierno. Parlamentario Lopez-Tromp a indica cu e tipo di practicanan ta contra ley.
Pa cobertura mas amplio, lesa e edicion di TREMPAN.
