Recientemente a tuma luga un reunion publico den parlamento. Entre otro ta partido MAS despues di mas cu un aña cu a pidi pa Minister Glenbert Croes bin duna cuenta den parlamento a bataya dura contra e mandatario. Croes di su banda tambe a dirigi basta contra atake direccion di lider di fraccion di MAS, drs. Marisol Tromp. Croes ta di opinion cu Tromp tempo e tabata minister a haci y deshaci cu tereno di pais Aruba y ta p’esey nos ta sufriendo henter e dilema cu no tin tereno awendia pa nos pueblo.
Tromp di su banda a recorda e minister cu, tempo e tabata minister di infrastructura y alabes vice-prome minister di pais Aruba, ta tempo cu e tabata den partido MEP. Pues si ta ataca cu a otorga tereno pa loco, ta atacando e propio partido MEP. Tromp a bay asina leu di recorda e minister cu e tempo ey, MEP no tabata kier yiu di Betico Croes riba nan lista. Ta apenas cu a baha cabes y accepta pa Glenbert Croes join un biaha mas e partido cu su propio tata a funda na aña 1971 despues cu a milita hopi aña cu AVP.
E lider di fraccion di MAS ta di opinion cu e tempo ey el a structura henter e desaroyo teritorial riba nos isla. Claro, otorgando tereno pa desaroyo economico pero tambe pa casnan social, caminda cu te dia di awe no por mira ni un proyecto cu e gobierno a ehecuta. Ta mira proyectonan exitoso for di tempo cu e tabata minister den partido MEP. E propio gobierno actual ta violando leynan existente.
