“Na e momento aki, pais Aruba no tin un presupuesto aproba. Asina mes, e presupuesto 2021 no ta aproba ainda den parlamento”, asina drs. Marisol Lopez-Tromp, lider di partido Movimiento Arubano Soberano (MAS) a duna di conoce awe den un comentario di video. Cu e realidad aki riba mesa, Gabinete Wever-Croes ta stroba departamentonan di gobierno di por haci inversionnan den e diferente proyectonan pendiente. Tanten cu no tin inversion, no por papia di un stimulacion di nos economia. Den cierto forma, Gobierno., como e “compania” mas grandi di Aruba, tin nos economia stanca y secuestra na e momentonan aki!
Anualmente mester entrega e presupuesto di e siguiente aña prome cu dia 1 di september di e aña prome. Parlamento consecuentemente mester trata e presupuesto prome cu aña bolter, pa asina por drenta e aña nobo cu un presupuesto aproba y cla pa ehecuta. Desde september aña pasa, Gabinete Wever-Croes no a entrega e presupuesto y tampoco a atend’e. Eyden mester bin tur e medidanan y reformanan necesario pa por baha gastonan di gobierno y subi entrada. Ta dos formula so ta conoci, pero ningun di dos ta gana voto den campaña, pues gobierno a dicidi di laga e presupuesto para y asina hinca gobierno den man problema financiero.
Marisol Lopez-Tromp ta lamenta masha cu net awo cu nos economia mester di inversion, cu gobierno a dicidi di para tur esaki. Den esaki mester pensa riba inversion den educacion, salud, social, husticia y otronan. “Esaki ta algo hopi iresponsabel. Ta hopi importante pa Prome Minister Evelyn Wever-Croes sali splica pakico te cu awor aki ainda presupuesto 2021 no ta poni riba agenda di parlamento di Aruba. Tambe, dicon presidente di Parlamento no a yama e reunion aki”, segun Marisol Lopez-Tromp a indica.
El a bisa mas leu di no ta spera cu Gabinete Wever-Croes a imagina pa comete un acto asina iresponsabel manera hala e reunion te despues di eleccion. Esaki pasobra ainda lo tuma tempo prome cu parlamento sinta y bay forma un gobierno nobo. Prome cu tin un gobierno nobo sinta, lo tuma algun siman mas. Y pa e ora ey e gobierno nobo bay trata un presupuesto pa e aña aki, di cual entretanto mas cu mita di e aña a pasa caba.
Di acuerdo cu ley, pa departamentonan di gobierno por sigui draai toch, nan por uza solamente un parti chikito di e placa disponibel, basa ainda di locual a presupuesta di aña pasa. Pero no por hinca placa den nada nobo cu mester inverti den dje. Ta cu e realidad aki riba mesa, partido MAS ta boga pa vota pa parlamentarionan capas pa atende e tipo di retonan aki. Y no for di awor, sino cu mester a trata e presupuesto aki for di aña pasa caba.
Door di bira lomba pa e realidad financiero cu e mesun Gabinete Wever-Croes a hinca gobierno aden, ta comete un acto masha iresponsabel di laga e pais sigui draai sin presupuesto. Ta pa e mesun tipo di maneho descabeya y iresponsabel aki, cu awe gobierno di Hulanda a institui un COHO riba nos pa supervisa maneho financiero di nos pais.
