E barco di Marina Hulandes Zr.Ms. Holland durante su prome simannan operacional a intercepta dos transporte di droga den lama Caribe.
E prome asina yama ‘go-fast’ a keda descubri pa un avion patruyero maritimo Mericano, despues di cua Zr.Ms. Holland a drenta accion. Cu helicopter di Wardacosta Mericano y e botonan di intercepcion rapido FRISC, a logra localisa e ‘go-fast’. E prome ‘go-fast’ tabatin casi 500 kilo di droga contrabanda na bordo. E di dos transporte di droga intercepta tabata 400 kilo di cocaina. Tur e paketenan a keda confisca y e contrabandistanan sospechoso cu tabata a bordo di e go-fast nan, a keda aresta.
E sospechosonan y ademas di e contrabanda mas despues a keda entrega na un cutter di Wardacosta Mericano, pa keda persigui na Merca. A confisca un total di 900 kilo di droga.
For di october 2022 Zr.Ms. Holland ta activo como barco patruyero den Region Caribe Hulandes, y ta intercambia e operacionnan anti droga cu sosten na Wardacosta Region Caribe.
