Maria College MAVO ta un di e scolnan cu a celebra e logro di su alumnonan. Angeline Rosenstand ta director di e scol y a comenta cu nan ta sumamente orguyoso di e alumnonan como cu e scol ta para pa “team work. Rosenstand a continua bisando cu alrededor di cuater pa cinco aña pasa nan a sembra e simia y conhuntamente cu mayor y docente por mira e fruto di locual nan a cosecha.
Rosenstand a continua bisando cu nan a bay examen cu 160 alumno y un total di 141 a logra gradua den e prome periodo. Esaki ta pone cu e porcentahe ta 88%. “Ainda nos no ta cla, pasobra falta e alumnonan cu falta HER”, tabata e palabranan di e director.
Ainda falta e alumnonan cu pa un of otro motibo no a logra gradua den e prome periodo. Rosenstand y su coleganan ta orguyoso di e resultado aki mirando cu e aña aki nan ta celebra 80 aña. E pronostico final despues di e dos periodo ta un total di 98%.
MENSAHE FINAL
Pa finalisa, director di Maria College MAVO, Angeline Rosenstand a manda un mensahe pa su alumnonan cu ta “Kere den bo mes mescos cu nos ta kere den boso. Boso tin hopi potencial.” E director ta sigur cu nos tin hopi pa siña fo’i e hubentud.
Maria College ta conta cu por lo menos 575 alumno y 43 docente. Nan ta para pa nan lema “I AM BECAUSE WE ARE” cu ta incorpora hunto cu nan logo. Un y tur mester traha hunto, es decir tanto alumno ta bin hunto, den un ‘teamwork’, unda traha hunto ta hopi importante.
