La Salle College a cera conoci cu e graduadonan p’e aña escolar aki. Durante un atardi ameno, hunto cu docente-, famia- y demas coleganan studiante, a celebra e logro di cada studiante. EIgmar Davelaar, director di La Salle College, a comenta cu e tabata un dia di alegria y tristesa combina mirando cu no ta tur studiante a logra gradua den e prome periodo aki. Tur cu a traha duro a saca probecho di nan logro rib’e dia ‘ki.
Ademas di esaki el a agrega cu e hopi tabata contento y esaki sigur ta algo cu nan a sa di demostra. Pa loke ta trata e porcentahe, den e prome periodo 80% di studiante a logra gradua. E expectativa di Davelaar ta cu den e di dos periodo e porcentahe lo por subi un poco mas, e docentenan lo ta contento si por yega 84% di graduado.
Compara cu aña pasa, e tin poco menos den e aña ‘ki. Pero meneer Davelaar ta spera cu por surpasa esaki despues di e di dos periodo, tin posibilidad cu esaki lo por surpasa e porcentahe di aña pasa. Alabes Davelaar a menciona cu no mester lubida cu tabatin Covid y mester a lucha cu esaki. E alumnonan mester a durante extra di nan parti durante di e periodo aki mirando cu esaki tabata “challenging”.
MIHO GRADUADO
Pa loke ta trata e miho graduadonan, e aña aki tin tres. Dos alumno pa shete materia y un alumno pa seis materia, ta trata di Rosanny Almonte y Morgan de la Cruz pa shete materia y Ethiën Maduro pa seis materia. No ta algo usual pa dos alumno saca e mesun cantidad di punto.
MENSAHE P’E ALUMNONAN
Pa finalisa e director a informa cu e HER ta cuminsa dialuna awo pues nan no tin hopi dia pa siña. A duna e alumnonan chens pa scoge cua ta e materia cu nan ta desea di HER. Mensahe final di e director ta pa pasa door di e cifranan y scoge bon.
Tambe si e alumno ta sinti cu e tin poco problema e tin e oportunidad pa pasa cerca e docente y pidi ayudo. Davelaar a enfatisa cu no tin mucho dia mas pues nan tin e fin di siman aki so.
Compara cu e añanan anterior, e biaha aki tin oportunidad pa dos HER pues ta algo pa saca bon probecho di dje.
La Salle College ta un scol catolico pa enseñansa avansa, na unda hoben di diferente ambiente social, economico, rasa y cultura, bou guia di docente responsabel y capacita, den ambiente amabel, cu ordo y disciplina, ta wordo forma pa funciona optimalmente den comunidad.
