E ta official! Cu hopi placer promotornan di e concierto di Marco Antonio Solis cu lo tuma lugar dia 10 di November proximo, ta anuncia cu Marco Antonio Solis ta bay Harbour Arena.
Despues cu na inicio a anuncia cu e concierto lo tuma lugar den Entertainment Center, promotornan awe a dicidi cu mester haci un cambio danki na e gran acogida ricibi for di comunidad.
E concierto ta resultando di ta uno sumamente grandi, na unda cu tur cos ta indica cu Entertainment Center lo keda chikito pa e cantidad di persona y fanaticonan cu ta cumprando nan entrada pa mira e artista den concierto.
Ta trata aki di un decision cu tanto promotor pero tambe manager di Marco Antonio Solis a tuma y aproba mirando cu tur cos ta mustra cu ta solamente mas grandi e concierto aki lo bira y un y tur cu a cumpra nan entrada, mester por gosa debidamente di e concierto.
E promotornan kier pone enfasis, cu logisticamente nada lo cambia den e venue. Tur persona cu ya caba a cumpra nan entradanan general of esnan cu ya caba a mira e mapa VIP y a escoge nan asiento por ta trankil cu tur cos lo keda mesun cos y na mesun lugar. Simplemente e venue anterior ta mustranto di no lo por acapara e magnitude di hende cumprando nan entradanan pa e concierto aki.
Na e momentonan aki por bisa cu Aruba ta surpasando tur expectative cu tin pa e concierto y ta hacienda e uno magno.
E concierto cu Aruba lo presencia dia 10 di November ta uno sin igual, mirando cu ta pa prome biaha Marco Antonio Solis lo ta riba escenario aki na Aruba. Ya caba nos por mira riba rednan social parti di su gira yama: El Mas Querido Tour, di cual netamente ta loke Aruba tambe lo prescenia awor den Harbour Arena. Pues si abo no a cumpra bo ticketnan ainda pa Marco Antonio Solis, nos ta recomendabo pa haci esaki mas pronto posibel na e oficina situa na Renaissance Seaport Marketplace como cu esaki ta garantisa di lo bira e concierto di aña 2019!
