Comision fiho di Parlamento di Infrastructura y Medio Ambiente a reuni cu Stichting Parkietenbos Aruba. Parlamentario di POR, Alan Howell a duna di conoce cu e reunion aki tabata uno positivo, e enfoke a bay riba e aspecto humano y no e parti material/financiero manera cu sa sosode durante reunionnan cu otro instancianan.
E fundacion aki a trece e preocupacionnan dilanti cu cual nan ta biba pa añanan cu nan. E habitantenan di Parkietenbos y vecindario pa hopi aña no a wordo scucha, por a scucha cu hopi a wordo papia, pero nada a wordo realisa pa mehora nan situacion. Contrario na esaki, awe finalmente nan puntonan si ta wordo scucha realmente y ta den proceso di wordo atendi manera debe ser.
“Nan tin tur rason pa ta sinti asina debi na e forma den cual nan ta bibando aden pa bastante aña caba. E holo di gas, e holo stinki cu tin ora cu nan habri nan bentana of tin bes hasta cu bentana cera e holo stinki aki ta penetra den nan cas. No ta solamente e holo di Parkietenbos, nan a menciona tambe esun di Ecogas cu ta un molester pa nan pa basta tempo caba”, Alan Howell a duna di conoce.
E ta agrega cu tin cu bay para keto y concentra riba e bida y salud di e habitantenan cu a biba pa añanan largo na Parkietenbos y vecindario y cu ta sufriendo di e forma con Aruba su sushi ta wordo deposita na Parkietenbos.
Howell ta bay mas leu ainda y ta puntra cuanto persona cu tabata biba na Parkietenbos ya a fayece, cuanto di esnan cu ta biba den vecindario tin cancer of diferente otro tipo di enfermedad como consecuencia di e ambiente den cual nan ta bibando aden?
Ser humano mester ta central prome cu discuti kende ta gana of perde placa, cua comerciante ta bay dilanti of ta bay atras. Mester para keto y concentra riba bida y salud di habitantenan cu ta biba pa añanan largo den un situacion deplorabel. Pesey Alan Howell ta comenta riba e ley di Serlimar, cual ta papia specificamente di un modelo structural di con ta bay logra cera e dump aki y e ta sinti cu e stichting ta para tras di ley aki ya cu e ta bay brinda e oportunidad pa definitivamente cera e dump.
“Pa prome biaha den historia tin un gobierno cu por mustra riba plannan concreto con ta bay yega na un formula pa cera e dump aki definitivamente y no pa cera esaki y habrie otro caminda”, Parlamentario di POR a conclui.
